काठमाडौं । प्रभु बैंक लिमिटेडले चालू आर्थिक वर्षको दोस्रो त्रैमासको वित्तीय विवरण प्रकाशन गरेको छ । कम्पनीले यस अवधिसम्म १ अर्ब १९ करोड ९९ लाख खुद नाफा आर्जन गरेको छ । सेञ्चुरी कमर्सियल बैंक लिमिटेडलाई प्राप्ति गरी पुस २६ गतेदेखि एकीकृत कारोबार गरेको यस बैंकको खुद नाफा गत वर्षको दोस्रो त्रैमाससम्मको तुलनामा करिब ५ प्रतिशतले गिरावट देखिएको छ । गत वर्ष यस अवधिसम्म बैंकले १ अर्ब २६ करोड २० लाख खुद नाफा आर्जन गरेको थियो ।
यस वर्ष कम्पनीको सञ्चालन नाफा १२ दशमलव ५० प्रतिशतले घटेको छ । गत वर्ष १ अर्ब ८६ करोड ८१ लाख रूपैयाँभन्दा बढी सञ्चालन नाफा गरेको कम्पनीले यस वर्ष १ अर्ब ६३ करोड ४१ लाख रूपैयाँभन्दा बढी मात्र सञ्चालन नाफा गरेको छ ।
दोस्रो त्रैमाससम्म कम्पनीको वितरणयोग्य नाफा ३६ करोड ४२ लाख रूपैयाँभन्दा बढी रहेको छ । हाल कम्पनीको चुक्तापूँजी २३ अर्ब ५४ करोड २४ लाख ९० हजार रहेको छ । जगेडा कोष रकम भने ९ अर्ब ८ करोड रूपैयाँभन्दा बढी रहेको छ ।
कम्पनीको निक्षेप संकलन गत वर्षकोभन्दा ५१ दशमलव ६५ प्रतिशत बढी र कर्जा प्रवाह ६८ दशमलव ७९ प्रतिशत बढी भएको छ । यस वर्ष कम्पनीले २ खर्ब ७० अर्ब ९२ करोड निक्षेप संकलन गरेको छ भने २ खर्ब ४५ अर्ब ३८ करोड कर्जा लगानी गरेको छ ।
गत वर्ष १ दशमलव २३ प्रतिशत रहेको कम्पनीको निष्क्रिय कर्जा अुनपात यस वर्ष १ दशमलव ९८ प्रतिशत पुगेको छ । प्रतिशेयर आम्दानी १० रूपैयाँ १९ पैसा रहेको यस बैंकको प्रतिशेयर नेटवर्थ १४० रूपैयाँ १२ पैसा रहेको छ ।
