काठमाडौं । सगरमाथा जलविद्युत कम्पनीले आजदेखि आयोजना प्रभावित क्षेत्रका बासिन्दा र वैदेशिक रोजगारमा गएका श्रमिकहरुका लागि आइपिओ निष्काशन तथा बिक्री खुला गरेको छ । कम्पनीले आयोजना प्रभावित क्षेत्रका बासिन्दाका लागि ११ लाख २० हजार कित्ता र वैदेशिक रोजगारीमा गएका नेपालीहरुका लागि ४ लाख ३६ हजार कित्ता शेयर निष्काशन गरेको छ ।
आयोजना प्रभावित क्षेत्र इलाम जिल्लाबासीले न्युनतम १० कित्तादेखि अधिकतम १० हजार कित्तासम्मको लागि आवेदन दिन पाउने छन् । त्यस्तै वैदेशिक रोजगारमा गएका नेपालीहरुले न्युनतम १० कित्तादेखि अधिकतम ५० हजार कित्तासम्मको लागि आवेदन दिन सक्ने छन् । दुबै समुहका लगानीकर्ताले छिटोमा यहि माघ १९ गतेसम्ममा आवेदन दिन पाउने छन् । यो अवधिमा माग बराबरको लागि आवेदन नपरेमा ढिलोमा फागुन ५ गतेसम्म आवेदन खुला राख्ने धितोपत्र निष्काशन तथा बिक्री प्रवन्धक प्रभु क्यापिटलले जनाएको छ ।
वैदेशिक रोजगारमा गएका नेपालीहरुले सि-आस्वा प्रदान गर्ने सम्पुर्ण बैंक वित्तीय संस्थाबाट आवेदन दिन सक्ने छन् भने प्रभावित बासिन्दाले इलाम जिल्लामा रहेका प्रभु बैंक, सेञ्चुरी कमर्सियल बैंक र प्राइम बैंकमा खरिद आवेदन पेस गर्न सक्नेछन् । त्यस्तै प्रभावितले प्रभु क्यापिटलले तयार पारेको अनलाइनबाट आवेदन दिन सकिनेछ ।
