काठमाडौं । नेपाल स्टक एक्सचेन्जले सेन्ट्रल फाइनान्स लिमिटेडको शेयर कारोबार फुकुवा गरेको छ । कम्पनीको लाभांशसम्बन्धी सूचना धितोपत्र सूचीकरण विनियमावली बमोजिम नभएको भन्दै नेप्सेले पुस ६ गतेदेखि कारोबार रोक्का गरेको थियो । पुस ३ गतेको कम्पनीको सञ्चालक समितिको बैठकले गरेको लाभांशसम्बन्धी निर्णय पुस ६ गते कारोबार समय १२ः३९ मा सार्वजनिक गरेको भन्दै नेप्सेले स्पष्टीकरण माग गर्दै कारोबार रोक्का गरेको थियो ।
कम्पनीले मानवीय त्रुटिका कारण सूचना सार्वजनिक गर्न ढिला हुन गएको र भविष्यमा यस्ता गल्ती नदोहोर्याउने प्रतिबद्धता व्यक्त गरेकाले सचेत गराउँदै कारोबार फुकुवा गरेको हो । धितोपत्र सूचीकरण विनियमावलीमा भएको व्यवस्थाअनुसार धितोपत्र मूल्यमा प्रभाव पार्ने सूचना, जानकारी तथा निर्णय सिर्जना भएमा सोही दिन वा भोलिपल्ट कारोबार खुल्नुअघि नेप्सेमा पेश गर्नुपर्ने व्यवस्था छ ।
कम्पनीले गत आर्थिक वर्ष २०७८/७९ सम्मको सञ्चित मुनाफाबाट यस वर्ष ५ प्रतिशत नगद लाभांश वितरण गर्ने निर्णय गरेको छ । उक्त लाभांश पारितका लागि कम्पनीले पुस २९ गते वार्षिक साधारण सभा गर्दैछ
