काठमाडौं । नेपाल बीमा प्राधिकरणका अध्यक्ष सूर्य प्रसाद सिलवालले नेपाल पुनर्बीमा कम्पनीका अध्यक्ष इश्वरी प्रसाद अर्याललाई पद तथा गोपनियताको शपथ ग्रहण गराएका छन् । शपथ ग्रहण कार्यक्रममा प्राधिकरणका कार्यकारी निर्देशक राजुरमण पौडेल सहित बीमा कम्पनीका प्रमुख कार्यकारी अधिकृत शंकर कुमार रायमाझी र सहायक प्रमुख कार्यकारी अधिकृत दामोदर भण्डारी लगायतको उपस्थिति थियो ।
मंसिर १९ गते बसेको मन्त्रिस्तरको बैठकले अर्याललाई अध्यक्षमा नियुक्ति गरेको थियो । कम्पनीका निवर्तमान अध्यक्ष रविद्र प्रसाद घिमिरेले पदबाट राजिनामा दिए सँगै सरकारले अर्याललाई अध्यक्ष पदमा नियुक्त गरेको हो ।
कोरोना बीमाको दाबी भुक्तानीका विषयमा कुरा नमिले पछि अध्यक्ष घिमिरेले मार्गप्रस्त गरिदिएका थिए । कोरोना बीमाको दाबी भुक्तानी सहित कतिपय विषयमा घिमिरेले अडान लिए पछि उनलाई चौतर्फी दवाव आएको थियो । उनले बरु पदबाट राजिनामा दिने तर यस्ता निर्णय नगर्ने भन्दै अडान लिए पनि अर्थमन्त्री जनार्दन शर्माले नै उनलाई राजिनामा गर्न सुझाएका थिए ।
सरकारले नयाँ पुनर्बीमा कम्पनी हिमालयन रि-इन्स्योरेन्स कम्पनीलाई पोसाउने गरी नीतिगत निर्णय गरिरहेको छ । सरकारकै स्वामित्व भएको नेपाल पुनर्बीमाको व्यवसायमै असर पुर्याउने गरी प्राधिकरण र नेपाल सरकार लागिपरेका छन् । नव नियुक्त अध्यक्षले सरकारकै असहयोगलाई छिचोल्नु पर्ने चुनौती छ ।
