काठमाडौं । शाइन रेसुङगा डेभलपमेन्ट बैंकले महिलालाई वित्तीय साक्षरता तालिम प्रदान गरेको छ । बैंकले केन्द्रिय कार्यलय बुटवलमा बुटवल महानगरपालिका ११ को शहरी स्वस्थ्य केन्द्रका महिला स्वयंसेविका तथा कार्यालयका कर्मचारीलाई वित्तीय साक्षरता तालिम प्रदान गरेको हो ।
उक्त साक्षरता तालिममा बैंककी प्रमुख सञ्चालन अधिकृत नम्रता थापाले महिलाहरुलाई आर्थिक गतिविधि र बैंकिङ कारोबारमा सहभागी गराउँदै महिला सशक्तिकरणका लागि स्वास्थ्य स्वयंसेविकाहरुलाई वित्तीय साक्षरता प्रदान गरेको बताइन् । सहभागी ३५ जना महिलालाई उक्त तालिम दिइएको हो ।
नेपालको कुल जनसंख्याको ५० प्रतिशत भन्दा बढी हिस्सा महिलाको भए पनि उनीहरुमा वित्तीय साक्षरता दर धेरै कम भएकाले बैंकले महिलाहरुलाई प्राथमिकता दिएको थापाले बताइन् ।
बैंकका डिजिटल बैंकिङ अफिसर नारायण न्यौपानेले डिजिटल बैकिङ कारोबारको कारणले समयको पनि बचत हुने र सेवाग्राहीले घर वा कार्यालयमै बसेर सुरक्षित र छिटोछरितो सेवा लिन सकिने र डिजिटल बैंकिङमा अपनाउनु पर्ने सतर्कता लगायतका विषयमा सहभागीलाई बताए ।
