काठमाडौं । कालिञ्चोक दर्शन लिमिटेडको आइपीओमा पहिलो दिन वैदेशिक रोजगारीमा गएका ८३ जना नेपालीबाट आवेदन परेको छ । सिडिएस एण्ड क्लियरिङ लिमिटेड (सिडिएससी) ले दिएको जानकारीअनुसार यी आवेदकहरूबाट ४३ हजार ६०० कित्ता शेयर खरीद माग भएको छ ।
कम्पनीले सर्वसाधारणमा जारी हुने १० लाख ८० हजार कित्ता शेयरमध्ये १० प्रतिशत दरको १ लाख ८ हजार कित्ता आरक्षणस्वरूप वैदेशिक रोजगारीमा गएका नेपालीका लागि विक्री खुला गरेको हो । पहिलो दिन ४० दशमलव ३७ प्रतिशत शेयर खरीद माग भएको जानकारी सिडिएससीले दिएको छ ।
कम्पनीले मङ्सिर १४ गतेदेखि वैदेशिक रोजगारीमा गएका नेपालीसँगै आयोजना प्रभावित स्थानीयमा समेत आइपीओ जारी गरेको छ । स्थानीयबाट संकलन भएको आइपीओको तथ्यांक भने कम्पनीले सार्वजनिक गरेको छैन । कम्पनीले १ लाख २० हजार कित्ता शेयर आयोजना प्रभावित स्थानीय बासिन्दाका लागि निष्काशन गरेको छ ।
यस आइपीओ छिटोमा मङ्सिर २८ गते र ढिलोमा पुस १४ गतेसम्म विक्रीमा रहनेछ । वैदेशिक रोजगारीमा गएका नेपालीहरूले भने मंसिर २८ गतेसम्म मात्र आवेदन दिनुपर्नेछ । दुवै समूहका लगानीकर्ताका लागि यस आइपीओ खरीदमा न्यूनतम १० कित्ताको सीमा तोकिएको छ । स्थानीयले अधिकतम ४ हजार ९९० कित्ता र वैदेशिक रोजगारीमा रहेका नेपालीहरूले अधिकतम १० हजार ८०० कित्तासम्म माग गर्न सक्नेछन् ।
कम्पनीले आइपीओ निष्काशनका लागि गराएको रेटिङमा केयर रेटिङ नेपालले दायित्व वहन गर्न सक्ने क्षमतामा मध्यम स्तरको जोखिम रहेको संकेत गर्ने केयर एनपी डबल बी प्लस इस्युअर रेटिङ प्रदान गरेको छ ।
कम्पनीको आइपीओ विक्री प्रबन्धकमा नबिल इन्भेष्टमेन्ट बैंकिङ लिमिटेड रहेको छ । विक्री प्रबन्धकसँगै कालिञ्चोक दर्शन लिमिटेडको कार्यालयबाट आवेदन दिन सकिनेछ ।
साथै मेगा बैंक, सेञ्चुरी बैंक दोलखाको तोकिएका शाखा कार्यालय र नेपाल धितोपत्र बोर्डबाट अनुमति प्राप्त सम्पूर्ण आस्बा सदस्य बैंक तथा वित्तीय संस्थाबाट यो आईपीओ खरीद गर्न सकिने व्यवस्था छ ।
