काठमाडौं । इष्टर्न हाइड्रोपावर लिमिटेडको आइपीओमा हालसम्ममा १ करोड ३ लाख ११ हजार २७० कित्ताका लागि आवेदन परेको छ । सिडिएस क्लियरिङ्गका अनुसार आज सोमवार बिहान १०ः१२ बजेसम्ममा ९ लाख ४ हजार ८०५ आवेदकले उक्त कित्ताका लागि आवेदन दिएका हुन् । यो मागभन्दा १६ दशमलव ५४ गुणा बढी आवेदन हो ।
कम्पनीले पहिलो चरणमा आयोजना प्रभावित स्थानीयमा आइपीओ बाँडफाँडपछि दोस्रो चरणमा सर्वसाधारणलाई आइपीओ विक्री गर्न लागेको हो । कम्पनीले पहिलो चरणमा प्रतिकित्ता १ सय रुपैयाँ अंकित मूल्यका ६ लाख २० हजार कित्ता शेयर आयोजना प्रभावित क्षेत्रका बासिन्दाहरूका लागि बाँडफाँड गरी बाँकी रहेको ५० हजार ३१० कित्ता शेयरसमेत जोडेर ६ लाख ७० हजार ३१० कित्ता शेयर सर्वसाधारणमा विक्री गर्न लागेको हो ।
कुलकित्ता शेयरमध्ये ५ प्रतिशत अर्थात् ३३ हजार ५१५ कित्ता शेयर सामूहिक लगानी कोषको लागि सुरक्षित गरिएको छ भने २ प्रतिशत अर्थात् १३ हजार ४०६ कित्ता शेयर कर्मचारीहरूका लागि छुट्याइएको छ । यी बाहेक बाँकी ६ लाख २३ हजार ३८९ कित्ता शेयर भने सार्वजनिक निष्काशनमा आउन लागेको हो ।
सर्वसाधारणले सार्वजनिक निष्काशनमा आएको शेयर खरीदका लागि न्यूनतम १० कित्तादेखि अधिकतम १ लाख कित्तासम्म माग गर्दै आवेदन दिन सक्नेछन् । यो शेयर छिटोमा कात्तिक १ गतेसम्म विक्री खुला हुनेछ भने सो अवधिसम्म मागबमोजिम आवेदन नपरेमा भने ढिलो अवधि कात्तिक १४ गतेसम्म विक्री लम्बिनेछ ।
आइपीओ निष्काशनका लागि गराएको रेटिङमा केयर रेटिङ्गस नेपालले कम्पनीलाई समयमै वित्तीय दायित्व पूरा गर्न सक्ने सम्बन्धमा उच्च जोखिम रहेको संकेत गर्ने केयर एनपी बी प्लस इस्यूअर रेटिङ प्रदान गरेको छ । कम्पनीको शेयर निष्काशन तथा बिक्री प्रबन्धक एनएमबि क्यापिटल लिमिटेड छ ।
लगानीकर्ताले विक्री प्रबन्धकसँगै नेपाल धितोपत्र बोर्डबाट स्वीकृति प्राप्त गरेका सम्पूर्ण सि–आस्बा सदस्य बैंक तथा वित्तीय संस्था र तिनका तोकिएका शाखा कार्यालयहरू तथा मेरो शेयर वेब तथा एपबाट आवेदन दिन सकिने व्यवस्था छ ।
कम्पनीले भोजपुरमा ५ मेगावाट क्षमताको पिखुवा खोला जलविद्युत् आयोजना निर्माण सम्पन्न गरी २०७६ जेठ २८ गतेदेखि विद्युत् उत्पादन गर्दै आएको छ । उक्त आयोजनाको निर्माण लागत कुल १ अर्ब ३० करोड ५८ लाखभन्दा बढी छ भने प्रतिमेगावाट लागत २६ करोड ११ लाखभन्दा बढी छ ।
