काठमाडौं । ङादी ग्रुप पावर लिमिटेडको १२ लाख ५७ हजार २९० कित्ता लिलामी शेयरमा आवेदन दिने आज अन्तिम रहेको छ । आज कार्यालय समयसम्म मात्र इच्छुक आवेदकले उक्त लिलामी शेयरमा आवेदन दिन सक्नेछन् । कम्पनीले असोज २ गतेदेखि सर्वसाधारण समूहको शेयर लिलामी बिक्री खुला गरेको हो ।
लगानीकर्ताले न्यूनतम १०० तोकिएको हुँदा सो वा सो भन्दा बढी मूल्य अंकित गरी बोलपकबोल गर्न सक्नेछन् । न्यूनतम १०० कित्ता र अधिकतम सबै कित्ताका लागि आवेदन दिन सक्ने कम्पनीले जानकारी दिएको छ ।
कम्पनीले साउन १८ गतेदेखि भदौ ७ गतेसम्म १५० प्रतिशत हकप्रद शेयर बिक्री खुला गरेको थियो । कम्पनीले १ करोड ६ लाख ३ हजार ९८६ कित्ता हकप्रद शेयर बिक्री खुला गरेकोमा ९३ लाख ४६ हजार ६९६ कित्ताका लागि मात्र आवेदन परेको थियो । उक्त समयभित्र सम्पूर्ण हकप्रद शेयर नबिकेपछि कम्पनीले बाँकी रहेको शेयर लिलामीमा ल्याएको हो ।
बिक्री प्रबन्धक सिद्धार्थ क्यापिटल नारायणचौर, नक्साल, काठमाडौंबाट आवेदन दिन सकिनेछ । यसैगरी, सिद्धार्थ बैंक लिमिटेडका शाखा कार्यालयहरु विराटनगर, विर्तामोड, वीरगञ्ज , जनकपुर, पोखरा, बाग्लुङ्ग, बुटवल, घोराही, नेपालगन्ज, सुर्खेत, घनगढी र महेन्द्रनगरबाट पनि आवेदन दिन पाइनेछ ।
