काठमाडौं । भारतले धान र चामलको निर्यातमा भन्सार मूल्य बृद्धि गरेको छ । २० प्रतिशत भन्सार मूल्य बृद्धि गरेसँगै कनिका निर्यातमा भने रोक लगाएको हो । नेपाल दाल चामल उद्योग संघका अनुसार भारतले निर्यात गर्दै आएको सेतो र खैरो धान चामल निर्यातमा २० प्रतिशत कर बृद्धि गरेको हो ।
आर्थिक वर्ष २०७८,०७९ मा नेपालले ४७ अर्ब ५७ करोड ३६ लाख रुपैयाँका धान, चामल र कनिका आयात गरेको थियो । भारतले कर बृद्धि गर्ने निर्णयसँगै नेपालमा चामलको मूल्य महंगो हुने देखिएको छ । साथै नेपालमा कनिकाबाट उत्पादन हुने मदिरा उद्योग तथा दाना उत्पादनमा समेत समस्या आउने देखिएको छ ।
भारतले आफ्नो उत्पादन घटेको र विश्वमा खाद्य संकटको अवस्था देखिएकाले बजार मूल्य नियन्त्रण गर्न कर बृद्धि गरेको जनाएको छ । भारतका केही राज्यमा कम वर्षाका कारण हालसम्म चलिरहेको सिजनमा धानबालीको क्षेत्रफल ५.६२ प्रतिशतले घटेर ३८३.९९ लाख हेक्टरमा पुगेको छ । चीनपछि विश्वको दोस्रो ठूलो धान उत्पादक भारतको विश्व व्यापारमा ४० प्रतिशत हिस्सा ओगटेको छ ।
भारतले आर्थिक वर्ष २०२१/२२ मा २१.२ मिलियन टन चामल निकासी गरेको थियो, जसमा ३.९४ मिलियन टन बासमती चामल थियो । सोही अवधिमा ६ अर्ब ११ करोड अमेरिकी डलर बराबरको गैर बासमती चामल निकासी गरेको आधिकारिक तथ्यांक रहेको छ ।
