काठमाडौं । अभियान लघुवित्त वित्तीय संस्थाले आज साउन १८ गतेदेखि सर्वसाधारण लगानीकर्ताको लागि प्राथमिक शेयर निष्काशन गर्दैछ । कम्पनीले प्रतिशेयर अंकित मूल्य १०० रुपैयाँको दरका ९ लाख ७६ हजार कित्ता मध्ये ०.५ प्रतिशत अर्थात १२ हजार ५०० कित्ता कर्मचारीको लागि सुरक्षित गरिएको छ भने ५ प्रतिशत अर्थात ४८ हजार ७५० कित्ता सामुहिक लगानीकोषका लागि सुरक्षित गरिएको छ । कर्मचारी र सामुहिक लगानीकोषलाई सुरक्षित गरी बाँकी रहेको ९ लाख १५ हजार ७५० कित्ता शेयर सर्वसाधारणका लागि निष्काशन गरिनेछ ।
उक्त शेयरमा सर्वसाधारण लगानीकर्ताले साउन २२ गतेसम्म आवेदन दिन सक्ने छन् । यदि पहिलो चरणमा माग गरिए बराबरको लागि आवेदन नपरेमा मात्रै भदौ एक गतेसम्म निष्काशन हुनेछ । तर लघुवित्त वित्तीय संस्थामा लगानीकर्ताको सर्वाधिक आकर्षण हुने भएकाले माग भन्दा धेरै गुणा आवेदन पर्ने गरेको छ । त्यसैले लगानीकर्ताले अधिकतम १० कित्ता भन्दा बढीको लागि आवेदन दिइरहनु पर्दैन ।
आइपीओ निष्काशनका लागि गरिएको रेटिङ अनुसार संस्थाले ‘इक्राएनपि आइआर डबल वि’ प्राप्त गरेको छ । जसले कम्पनीको वित्तीय दायित्व बहन गर्ने क्षमतामा जध्यम जोखिम रहेको संकेत प्रदान गर्दछ ।
प्राथमिक शेयर निष्काशन पछि संस्थाको चुक्ता पूँजी २५ करोड रुपैयाँ पुग्नेछ । जसमा संस्थापक समुहको ६१ प्रतिशत रहेको छ भने सर्वसाधारण समुहको ३९ प्रतिशत छ ।
आइपीओ निष्काशन तथा विक्री प्रबन्धकमा मुक्तिनाथ क्यापिटल लिमिटेड रहेको छ । लगानीकर्ताले मेरो शेयरको अनलाइन एप्लिकेसन तथा सिआस्वा सुविधा प्रदान गर्ने सम्पुर्ण बैंक तथा वित्तीय संस्थाहरुबाट आवेदन दिन सकिनेछ ।
