काठमाडौं । राष्ट्रिय स्तरका बाणिज्य बैंकहरुबाट साउन दुई साताको अवधिमा ९२ अर्ब रुपैयाँले निक्षेप गायव भएको छ । साउन पछि बैंकहरुमा तरलता सहज हुने अनुमान गरिए पनि पहिलो सातामा ६४ अर्ब र दोस्रो सातामा २८ अर्ब रुपैयाँले निक्षेप घटे पछि यस वर्ष पनि तरलतामा चाप पर्ने देखिएको छ ।
अर्थमन्त्रालयले स्थानीय निकायको कोषलाई पनि बैंकिङ प्रणालीमा निक्षेपको रुपमा गणना गर्न पाउने व्यवस्था गरे पनि केहि शिर्षकका रकमलाई देखाउन नमिले पछि बैंकहरुको निक्षेप संकलन घटेको बैंकरहरुको भनाइ छ ।
साउन १३ गतेसम्मको अवधिमा बाणिज्य बैंकहरुले ४३ खर्ब ४३ अर्ब रुपैयाँ निक्षेप संकलन गरेका छन् । जवकी असार मसान्तमा बाणिज्य बैंकहरुको निक्षेप संकलन ४४ खर्ब ३३ अर्ब रुपैयाँ थियो । त्यस्तै कर्जा प्रवाह तर्फ पनि गिरावट नै देखिन्छ । साउन १३ गतेसम्ममा ४१ खर्ब ६४ अर्ब रुपैयाँ कर्जा विस्तार गरेको छ । जवकी साउन दोस्रो सातासम्ममा ११ अर्बले कर्जा विस्तार खुम्चिएको छ ।
निक्षेप बाहिरिए सँगै सिडी रेसियोमा चाप पर्न थालेको छ । यस अवधिमा सिडी रेसियो ८७.९८ प्रतिशत छ । ९० प्रतिशत भन्दा माथि नाघ्ने वित्तीकै बैंकहरुले नयाँ कर्जा प्रवाह गर्न सक्दैनन् ।
