काठमाडौं । एभरेष्ट बैंकले गत आर्थिक वर्षको चौथो त्रैमाससम्मको वित्तीय विवरण प्रकाशन गरेको छ । यस अवधिमा एभरेष्ट बैंकको खुद नाफा ४३ दशमलव ७७ प्रतिशतले बढेको छ । आर्थिक वर्ष ७७/७८ मा बैंकको खुद नाफा १ अर्ब ७७ करोड रहेकोमा आर्थिक वर्ष ७८/७९ को चौथो त्रैमासमा आइपुग्दा खुद नाफा बढेर २ अर्ब ५४ करोड पुगेको छ ।
९ अर्ब ४६ करोड चुक्ता पूँजी रहेको बैंकको रिजर्भमा १३ अर्ब २२ करोड रहेको छ । यस अवधिमा बैंकको वितरणयोग्य मुनाफा ३ अर्ब ८९ करोड रहेको छ ।
यस अवधिमा बैंकको खुद ब्याज आम्दानी ३७ दशमलव १५ प्रतिशतले बढेर ५ अर्ब ४२ करोड पुगेको छ । बैंकको कुल सञ्चालन आम्दानी ३२ दशमलव ८८ प्रतिशत बढेको छ भने सञ्चालन मुनाफा ४२ दशमलव ८२ प्रतिशत बढेको छ।
त्यस्तै बैंकको निक्षेप ७ दशमलव ८१ प्रतिशतले बढेर १ खर्ब ७२ अर्ब पुगेको छ भने कर्जा प्रवाह १३ दशमलव ९३ प्रतिशतले बढेर १ खर्ब ४५ अर्ब पुगेको छ ।
यस अवधिमा बैंकको प्रति शेयर आम्दानी २६ रुपैयाँ ८९ पैसा रहेको छ भने प्रति शेयर नेटवर्थ २४० रुपैयाँ ७३ पैसा रहेको छ । बैंकको मूल्य आम्दानी अनुपात १६.२३ गुणा रहेको छ
