काठमाडौं । साउन पहिलो सातामा बाणिज्य बैंकहरुको निक्षेप संकलन ६४ अर्बले घटेको छ । बैंकिङ प्रणालीबाट यति छोटो अवधिमै यति धेरै रकम बाहिरिदा सिडी रेसियो पनि बढेको छ । असार मसान्तमा ८६.४१ प्रतिशत रहेको सिडी रेसियो ८७.७५ प्रतिशत पुगेको छ ।
यस सातामा निक्षेप संकलन सँगै कर्जा लगानी पनि घटेको छ । सातादिनमै कर्जा लगानी १० अर्बले खुम्चिएको छ । बाणिज्य बैंकहरुले साउन ६ गतेसम्ममा ४३ खर्ब ७१ अर्ब रुपैयाँ कर्जा निक्षेप संकलन गरेका छन् भने ४१ खर्ब ६५ अर्ब रुपैयाँ कर्जा लगानी लगानी गरेका छन् ।
साउन पहिलो साता सरकारले बैंकिङ प्रणालीबाट असार मसान्तसम्मको कर तथा राजस्व राज्यको ढुकुटीमा तानेको छ । गत असार मसान्तमा बैंकहरुले कर्जाको व्याज तथा किस्ता उठाउनुका साथै सरकारको राजस्व पनि संकलन गरेका थिए । जसले गर्दा असार अन्तिम दुई सातामा एक खर्ब १० अर्बले निक्षेप संकलन भित्रिएको थियो । जसले बैंकहरुलाई नेपाल राष्ट्र बैंकको नियमन छल्न सहज बनेको थियो ।
