काठमाडौं । हिमालयन हाइड्रोपावर लिमिटेडले निष्काशन गरेको साधारण शेयरमा अन्तिम दिनसम्म १ अर्ब ८४ करोड रुपैयाँ बराबरको आबेदन परेको छ। असार १५ देखि बिक्रि खुला गरिएको आइपीओमा हिजो आइतबार बेलुका ५ बजेसम्म १६ लाख २६ हजार ४३० जनाले १ करोड ८४ लाख १९ हजार ९८० कित्ताको लागि आबेदन दिएको सिडीएस एण्ड क्लियरिंङ लिमिटेडले जनाएको छ।
कम्पनीले असार १५ गतेदेखि ६ लाख १८ हजार २५० कित्ता सहित गरी कुल १९ लाख ६८ हजार २५० कित्ता साधारण शेयर निष्काशन गरेको थियो । कम्पनीले स्थानीयमा बैशाख २५ गतेदेखि जेठ २३ गतेसम्म विक्री गरेको थियो । स्थानीयमा विक्री गरेको आइपीओमा रितपूर्वक आवेदन दिने आवेदकहरूलाई जेठ ३१ गते आइपीओ बाँडफाँड समेत गरिसकेको छ ।
कम्पनीले निष्काशन गरेको कुल शेयरमध्ये २ प्रतिशत अर्थात ३९ हजार ३६५ कित्ता शेयर कर्मचारीहरुका लागि सुरक्षित गरिएको थियो भने ५ प्रतिशत अर्थात ९८ हजार ४१३ कित्ता शेयर सामूहिक लगानी कोषमा बाँडफाँड गरिएको छ । बाँकी रहेको १८ लाख ३० हजार ४७२ कित्ता शेयरमा सर्वसाधारणले आवेदन दिने व्यवस्था थियो ।
कम्पनीको शेयर निष्काशन तथा बिक्री प्रबन्धक ग्लोबल आइएमई क्यापिटल लिमिटेड रहेको छ । लगानीकर्ताले न्यूनतम १० कित्ता शेयर खरिदका लागि आवेदन दिनुपर्नेछ भने अधिकतममा १ हजार कित्ताका लागि आवेदन दिने व्यवस्था थियो ।
