काठमाडौं । हाइड्रो इलेक्ट्रिसिटी इन्भेस्टमेन्ट एन्ड डेभलपमेन्ट कम्पनी (एचआईडीसीएल) ले ५७ दशमलव ३ मेगावाटको म्याग्दी खोला जलविद्युत् आयोजना निर्माण गरिरहेको प्रवर्द्धक हाइड्रो भिलेजमा २० प्रतिशत स्वपूँजी लगानी गर्ने भएको छ ।
लगानीसम्बन्धी सम्झौतामा एचआईडीसीएलका प्रमुख कार्यकारी अधिकृत अर्जुनकुमार गौतम र आयोजनाको प्रवर्द्धक हाइड्रो भिलेजका अध्यक्ष क्याप्टेन रामेश्वर थापाले हस्ताक्षर गरेका छन् ।
कम्पनीले स्वपूँजी लगानीको दायरालाई फराकिलो बनाउँदै लैजाने तथा सार्वजनिक निजी साझेदारी (पीपीपी) अवधारणाअनुसार उक्त आयोजनामा लगानी गर्ने निर्णय गरेको हो ।
उक्त अवसरमा एचआईडीसीएलका प्रमुख कार्यकारी अधिकृत गौतमले एचआईडीसीएलको ११ वर्षको लगानी यात्रामा स्वपूँजी लगानी गरेको यो चौथो आयोजना रहेको बताए ।
म्याग्दीको धवलागिरि गाउँपालिकाको बगरमा निर्माण हुने यो नदी प्रवाही आयोजनाको ३ वर्ष अगाडि नै नेपाल विद्युत् प्राधिकरणसँग विद्युत् खरीद सम्झौता भएको थियो । अब उक्त आयोजनामा हाइड्रो भिलेज, एचआईडीसीएल र मलेशियन कम्पनीको स्वामित्व रहनेछ ।
