काठमाडौं । नेपाल बैंकर्स एसोसिएशनले सार्वजनिक गरेको तथ्यांक अनुसार वाणिज्य बैंकहरुको सिडी रेसियो करिव ९१ प्रतिशत पुगेको छ । वैशाख १६ गतेसम्मको तथ्याङ्क अनुसार बैंकहरुको सिडी रेसियो ९० दशमलव ९९ प्रतिशत रहेको छ ।
वैशाख १६ गतेसम्म वाणिज्य बैंकहरुमा ४३ खर्ब ६७ अर्ब ५९ करोड निक्षेप रहेको छ । अघिल्लो हप्ता अर्थात बैशाख ९ गतेसम्म सो निक्षेप ४३ खर्ब ६७ अर्ब १३ करोड थियो । यसरी हेर्दा यो हप्ता निक्षेप संकलनमा खासै परिवर्तन भएको पाईदैन ।
तर वैशाख ९ गते र वैशाख १६ गतेको तथ्यांकलाई आधार मान्दा कर्जा प्रवाह भने २ अर्ब ९४ करोडले वृद्धि भएको छ। वैशाख ९ गतेसम्म ४१ खर्ब ९३ अर्ब ९३ करोड रहेको कर्जा प्रवाह वैशाख १६ गते ४१ खर्ब ९६ अर्ब ८७ करोड पुगेको छ।
