काठमाडौं । नाडेप लघुवित्त वित्तीय संस्था लिमिटेडले चालु आर्थिक वर्ष २०७८/७९ को तेस्रो त्रैमाससम्मको अपरिष्कृत वित्तिय विवरण प्रकाशित गरेको छ । उक्त विवरणअनुसार समिक्षा अवधिसम्म संस्थाले ५ करोड ६९ लाख रुपैयाँ खुद नाफा आर्जन गरेको छ । गत वर्षको यही अवधिको तुलनामा संस्थाको नाफा ४९ दशमलव ९८ प्रतिशतले कमी हो । गत वर्ष यही अवधिमा संस्थाले ११ करोड ३७ लाख रुपैयाँ बढी खुद नाफा आर्जन गरेको थियो ।
यस अवधिमा संस्थाको सञ्चालन मुनाफा पनि ५१ दशमलव २० प्रतिशतले घटेर ८ करोड ६७ लाख रुपैयाँ भएको छ । गत वर्ष यही अवधिमा संस्थाको सञ्चालन मुनाफा १७ करोड ७८ लाख रुपैयाँ रहेको थियो ।
यस अवधिमा संस्थाको खुद ब्याज आम्दानी तथा संचालन मुनाफामा गिरावट आएसँगै संस्थाको मुनाफा घटेको हो । समिक्षा अवधिमा संस्थाको खुद ब्याज आम्दानी गत आर्थिक वर्षको सोही अवधिको तुलनामा १९ दशमलव १४ प्रतिशतले घटेर २९ करोड १७ लाख रुपैयाँ कायम भएको छ । गत वर्ष यही अवधिमा यस्तो आम्दानी ३६ करोड ७ लाख रुपैयाँ रहेको थियो ।
यस अवधिमा संस्थाको प्रतिशेयर आम्दानी (ईपीएस) १५ रुपैयाँ ६२ पैसा रहेको छ । प्रतिसेयर नेटवर्थ १६९ पैयाँ ५७ पैसा रहेको छ भने तरलता अनुपात ८.३५ प्रतिशत रहेको छ ।
