काठमाडौं । नेपाल लाइफ इन्स्योरेन्स कम्पनीले बैशाख महिनामा तोकिएको टार्गेट पुरा गर्ने अभिकर्तालाई हेलिकप्टरद्धारा गोसाईकुण्डको दर्शन गराउने भएको छ । बैशाख महिनामा मात्रै १० लाख वा सो भन्दा धेरै प्रथम बीमा शुल्क आर्जन गर्ने अभिकर्ताले यस्तो सुविधा पाउने भएका हुन् । यो योजना बैशाख ३० गतेसम्म मात्रै रहनेछ ।
बैशाख महिनामा आफ्नै कोडबाट ५० हजार रुपैयाँ प्रथम बीमा शुल्क आर्जन गर्ने अभिकर्ताले नियमित कमिशनका अतिरिक्त थप ५०० रुपैयाँ इन्सेन्टिभ प्राप्त गर्नेछन् । त्यस्तै ७५ हजार रुपैयाँ प्रथम बीमा शुल्क आर्जन गर्ने अभिकर्ताले टिसर्ट पाउने छन् । एक लाख रुपैयाँ आर्जन गर्नेले टिसर्ट र थप ५०० रुपैयाँ, एक लाख ५० हजार रुपैयाँ आर्जन गर्नले टिसर्ट र १६२५ रुपैयाँ, २ लाख रुपैयाँ आर्जन गर्नेले टिसर्ट र तीन हजार रुपैयाँ इन्सेन्टिभ पाउने छन् ।
यस योजनामा संस्थागत अभिकर्ताहरुलाई समावेश गरिएको छैन । प्राप्त हुने इन्सेन्टिभमा नियमन अनुसार १५ प्रतिशत कर कट्टि हुनेछ । प्रथम बीमा शुल्क आर्जनको हकमा तोकिएको टार्गेटमा ५० प्रतिशतको मात्रै गणना गरिने कम्पनीले जनाएको छ । म्यादी जीवन बीमा बापतको प्रिमियमलाई पनि यस इन्सेन्टिभको स्किममा गणना गरिने छैन ।
