काठमाडौं । बीमा समितिले सन्तोष प्रसाईलाई प्रभु लाइफको सल्लाहकारमा नियुक्तिका लागि स्वीकृती दिएको छ । गत कात्तिकमा नेपाल लाइफको प्रमुख कार्यकारी अधिकृत पदबाट राजिनामा दिएका प्रसाईलाई प्रभु लाइफले बीमा क्षेत्रको विज्ञका रुपमा सल्लाहकारको रुपमा प्रस्ताव गरेको थियो ।
चार्टर्ड एकाउन्टेन्ट प्रसाईले यस अगाडी नेपाल लाइफमा ४ वर्ष तीन महिना काम गरेका थिए । यस अवधिमा ८ महिना प्रमुख कार्यकारी अधिकृतको जिम्मेवारी पाएका थिए । उनि नियामक निकाय बीमा समितिको जागिर छाडेर नेपाल लाइफमा आएका थिए ।
प्रभु लाइफले प्रमुख कार्यकारी अधिकृत बनाउने गरि प्रसाईंलाई अहिले सल्लाहकारमा नियुक्त गरेको हो । बीमा समितिको नियम अनुसार एउटा संस्था छोडेको ६ महिना कटेसिमात्र अर्को संस्थामा सोहि पदमा नियुक्त लिन पाइने ब्यबस्था भएकोले प्रसाईं २०७९ बैशाख २२ गते देखि प्रमुख कार्यकारी अधिकृतको रुपमा नियुक्त हुन योग्य हुनेछन ।
