काठमाडौं । आज मात्रै ७० प्रतिशत बोनस शेयर र ३.६८ प्रतिशत नगद सहित ७३.६८ प्रतिशत लाभांश घोषणा गरेको जीवन विकास लघुवित्तको शेयरमा लगानीकर्ताहरु आकर्षित देखिएका छन् । आइतबार जीवन विकासको मात्रै ५८ करोड २ लाख रुपैयाँको खरिद बिक्री भएको छ ।
दोस्रो धेरै कारोबार हुनेमा नेपाल टेलिकम रहेको छ । नेपाल टेलिकमको मात्रै १९ करोड २० लाख रुपैयाँको खरिद बिक्री भएको छ । तेस्रो धेरै कारोबार भएको अरुण भ्याली हाइड्रोपावरको मात्रै १७ करोड १२ लाख रुपैयाँको किनवेच भएको छ । अपि पावरको शेयर पनि १६ करोड ५९ लाख रुपैयाँको कारोबार भएको छ ।
बोनस शेयर सूचिकृत भए सँगै हिमालयन डिष्ट्रिलरीको शेयर कारोबार बढेको छ । कम्पनीको मात्रै आज १५ करोड ३८ लाख रुपैयाँको खरिद बिक्री भएको छ । हकप्रद र बोनस शेयर घोषणा पछि खासै शेयर मूल्य बढ्न नसकेको नेशनल हाइड्रोपावरको शेयर १२ करोड २० लाख रुपैयाँको खरिद बिक्री भएको छ ।
सर्वाधिक धेरै कारोबार हुने अर्को कम्पनी एचआइडिसिएल रहेको छ । यसको ९ करोड २७ लाख रुपैयाँको खरिद बिक्री भएको छ । अपर तामाकोको शेयर मूल् पनि खासै सुधार नदेखिए पनि कारोबार रकम भने ८ करोड ६४ लाख रुपैयाँको भएको छ ।
विगतका वर्षको तुलनामा कम लाभांश घोषणा गरेको नेपाल लाइफको ८ करोड १८ लाख रुपैयाँको शेयर खरिद बिक्री भएको छ । सर्वाधिक धेरै लगानीकर्ता बनाएको निफ्राको पनि सर्वाधिक धेरै १० कारोबार भएको कम्पनी मध्ये १० औ नम्बरमा परेको छ । निफ्राको मात्रै ८ करोड १७ लाख रुपैयाँको खरिद बिक्री भएको छ ।
