काठमाडौं । जीवन विकास लघुवित्त वित्तीय संस्था लिमिटेडले चालु आर्थिक वर्ष २०७८/७९ को दोश्रो त्रैमाससम्मको अपरिष्कृत वित्तिय विवरण प्रकाशित गरेको छ । उक्त विवरण अनुसार चालु आर्थिक वर्षको दोश्रो त्रैमाससम्म आइपुग्दा संस्थाले ४० करोड १६ लाख ५८ हजार रुपैयाँ खुद नाफा आर्जन गर्न सफल भएको छ । गत आथिृक वर्षको सोही अवधिको तुलनामा कम्पनीको नाफा ९ दशमलव ०९ प्रतिशतले धेरै हो । गत वर्षको सोही अवधिमा संस्थाले ३६ करोड ८१ लाख ७२ हजार रूपैयाँ खुद नाफा आर्जन गरेको थियो।
त्यस्तै, संस्थाको चुक्ता पुँजी ६० करोड ८४ लाख रुपैयाँ र जगेडा कोषमा एक अर्ब ७२ करोड २१ लाख ९० हजार रुपैयाँ सञ्चित रहेको छ ।
समिक्षा अवधिसम्म संस्थाको खुद व्याज आम्दानी पनि १०९ दशमलव ३९ प्रतिशतले बढेर ८० करोड ३० लाख १४ हजार रूपैयाँ पुगेको छ । गत वर्षको सोही अवधिमा संस्थाको खुद व्याज आम्दानी ३८ करोड ३४ लाख ९३ हजार रूपैयाँ रहेको थियो ।
दोश्रो त्रैमाससम्म आइपुग्दा संस्थाको सञ्चालन मुनाफा पनि बढेको छ । यस अवधिमा कम्पनीको संचालन मुनाफा ४१ करोड ५३ लाख ७९ हजार रूपैयाँ पुगेको छ । गत वर्ष संस्थाले ७ करोड ६४ लाख ६६ हजार रूपैयाँ सञ्चालन मुनाफा गरेको थियो ।
संस्थाको वार्षिक प्रतिशेयर आम्दानी १३२ रुपैयाँ ४ पैसा र प्रतिसेयर नेटवर्थ ३८३ रुपैयाँ ७ पैसा रहेको छ ।
