काठमाडौं । स्थानीय निकायको चुनावको विषयमा अलमलिएको सत्तारुढ गठबन्धन आगामी जेठभित्र चुनाव गर्न तयार भएका छन् । सत्तारुढ गठबन्धनमा रहेका दलहरुको संयुक्त बैठकले सरकारलाई जेठ भित्र स्थानीय निर्वाचन गर्न सुझाव दिने निर्णय गरेको छ ।
चुनाव नहुने संकेतले गत साता ओरालो झरेको शेयर बजार यस साता पुनः सुधार हुने भएको छ । चुनावको घोषणा पछि शेयर बजार बढ्ने अनुमान गरेका लगानीकर्ताले चुनाव घोषणामा भएको अलमल सँगै शेयर बिक्री गरेका थिए । यहि कारणले विगत एक महिनादेखि लगातार सुधार भएको शेयर बजारमा १५५ अंकले करेक्सन भएको छ । यो करेक्सन अझै केहि समय लम्बिने अनुमान गरिए पनि सत्तारुढ गठबन्धले चुनावमा जाने निर्णय गरे सँगै भोलिदेखिनै सुधार हुने विश्लेषकहरु बताउछन् ।
गठबन्धनको निर्णयपछि अब सरकारले निर्वाचन आयोगसँगको परामर्शमा स्थानीय तहको निर्वाचनको मिति तोक्नेछ । आजको बैठकले स्थानीय तह निर्वाचन ऐन २०७३ संशोधन गर्ने पनि निर्णय गरेको छ । स्थानीय तहको जनप्रतिनिधिको कार्यकालसम्बन्धी व्यवस्था नेपालको संविधानसँग बाझिएको भन्दै त्यसलाई संविधानसम्मत हुने गरी संशोधन गर्ने सहमति भएको छ ।
यसअघि सत्तारुढ गठबन्धनमा स्थानीय तह निर्वाचन ऐन संशोधन गरी स्थानीय तहको निर्वाचन धकेल्ने विषयमा छलफल भएको थियो । यहि कारणले गत साता शेयर बजारमा ठुलो गिरावट देखिएको थियो । बिहीबार प्रधानमन्त्री शेरबहादुर देउवासँगको भेटमा राष्ट्रपति विद्यादेवी भण्डारीले पनि स्थानीय निर्वाचन नसार्न आग्रह गरेकी थिइन् । स्थानीय तहको निर्वाचनको विषयलाई लिएर सरकारको चौतर्फी आलोचना हुँदै आइरहेको छ । स्थानीय तहको निर्वाचनमा अहिलेकै गठबन्धनले साझेदारी गर्ने कुरालाई लिएर कांग्रेस भित्र चर्को विरोध हुँदै आइरेको छ । कांग्रेसका उच्च स्तरका नेताहरुले चुनावमा पार्टी एक्लै लड्नु पर्ने दवाव एकातिर छ भने सत्तारुढ गठबन्धनले चुनावमा पनि एक भएर जानु पर्नु पर्ने दवाव दिदै आइरहेको छ । यहि कारण प्रधानमन्त्री शेरबहादुर देउवाले निर्वाचनको मिति तय गर्न सकिरहेका छैनन् ।
यदि सरकार चुनावमा होमियो भने नेताहरुले कालोधन चुनावमा खर्च गर्ने हुँदा बजारमा प्रयाप्त तरलता शिर्जना हुने र शेयर बजार बढ्ने विश्लेषकहरु बताउछन् । यहि कारणले जहिले पनि चुनाव अगाडी शेयर बजार सुधार हुने गरेको पाइन्छ ।
