काठमाडौं । आइसिएफसी फाइनान्स कम्पनीले चालू आर्थिक वर्षको दोस्रो त्रैमासको वित्तीय विवरण सोमवार सार्वजनिक गरेको छ । उक्त वित्तीय विवरण अनुसार कम्पनीको नाफा गत आर्थिक वर्षको दोस्रो त्रैमासको तुलनामा २४ प्रतिशतले घटेको छ । गत आर्थिक वर्षको दोस्रो त्रैमाससम्ममा कम्पनीले १२ करोड २५ लाख ७० हजार नाफा गरेको छ । चालू आर्थिक वर्षको सोही अवधिमा कम्पनीले ९ करोड २६ लाख ५४ हजार रुपैयाँ मात्र नाफा गरेको छ ।
चालू आर्थिक वर्षको दोस्रो त्रैमासमा कम्पनीको सञ्चालन नाफा पनि घटेको छ । गत आर्थिक वर्षको दोस्रो त्रैमासको तुलनामा चालू आर्थिक वर्षको सोही अवधिमा कम्पनीको संचालन मुनाफा २४ प्रतिशतले घटेको छ ।
त्यसैगरी चालू आर्थिक वर्षको दोस्रो त्रैमासमा कम्पनीको वितरणयोग्य नाफा ५ करोड ८ लाख ५३ हजार रुपैयाँ रहेको छ । चुक्ता पूँजी १ अर्ब १२ करोड ७१ लाख रहेको कम्पनीको जगेडा कोषमा ४७ करोड ९२ लाख ३२ हजार रुपैयाँ संचिती रहेको छ ।
चालू आर्थिक वर्षको दोस्रो त्रैमाससम्ममा कम्पनीले १५ अर्ब ४५ करोड ४८ लाख ३८ हजार निक्षेपन संकलन गरेको छ । त्यस्तै, कम्पनीले यस अवधिमा १२ अर्ब ८६ करोड ९४ लाख ८४ हजार रुपैयाँ कर्जा लगानी गरेको छ ।
यस अवधिमा कम्पनीको प्रति शेयर आम्दानी १६ रुपैयाँ ४४ पैसा रहेको छ । यस अवधिमा कम्पनीको मूल्य आम्दानी अनुपात ४७.१४ गुणा, प्रतिशेयर नेटवर्थ १४७ रुपैयाँ ०३ पैसा रहेको छ ।
