काठमाडौं । नेपाल धितोपत्र बोर्डले विगत ६ महिनादेखि रोकेर राखेको आइपिओ निष्काशन प्रकृयाँलाई हिजोदेखि खुला गरेको छ । बोर्डको अध्यक्षको अभावमा अन्य सञ्चालकहरुले आइपिओ निष्काशनको अनुमति दिने निर्णय गर्न सकेका थिएनन् ।
बुधबार बसेको सञ्चालक समितिको बैठकले ५ वटा कम्पनीलाई प्राथमिक शेयर निष्काशन गर्नका लागि अनुमति प्रदान गरेको कार्यबहाक अध्यक्ष निरज गिरीले जानकारी दिए । बोर्डले बलेफी हाइड्रोपावर, ग्रिन भेञ्चर हाइड्रोपावर, नेस्डो समृद्ध लघुवित्त वित्तीय संस्था, जालपा सामुदायित लघुवित्त वित्तीय संस्था र राष्ट्र उत्थान लघुवित्त वित्तीय संस्थाले अनुमति पाएका हुन् ।
बलेफी हाइड्रोपावर कम्पनीले ३६ करोड ५५ लाख ९४ हजार रुपैयाँ र ग्रिन भेञ्चरले ६२ करोड ५० लाख रुपैयाँ, जालपा लघुवित्तले ५ करोड २२ लाख, राष्ट्र उत्थानले ८ करोड ५० लाख र नेस्डो लघुवित्तले ८ करोड २८ लाख रुपैयाँको आइपिओ निष्काशनको अनुमति पाएका हुन् ।
बोर्डकै कर्मचारीहरुले प्राथमिक शेयर निष्काशनको अनुमति दिन नहुने भन्दै सञ्चालकहरुलाई सुझाउदै आइरहेका थिए । नियम अनुसार बोर्डको अध्यक्ष नहुँदा पनि अन्य सञ्चालकहरुले अनुमति दिन पाउने व्यवस्था थियो । तर भोलिका दिनमा फस्न सकिने भन्दै उनिहरुले प्राथमिक शेयर निष्काशनका लागि रोकेर राखेका थिए । यसरी ६ महिना भन्दा धेरै समय प्राथमिक शेयर निष्काशन प्रकृयाँ बन्द गर्दा कम्पनीहरुको पूँजी जुटाउने योजना प्रभावित भएको थियो ।
