काठमाडौं । कोभिड १९ को संक्रमण तिव्र गतिमा बढ्न थालेको छ । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा कोभिड १९ बाट संक्रिमितको संख्या २४४४ जनाले थपिएको छ । एक साता अगाडी दैनिक दुई सय हाराहारी मात्रै रहेकोमा केहि दिनदेखि तिव्र गतिमा बढिरहेको छ ।
संक्रमणदर बढे अनुसार मृत्यु हुनेको संख्या भने धेरै कम छ । पछिल्लो २४ घण्टामा कोभिड १९ का कारण एक जनाको मृत्यु भएको छ । हाल सक्रिय संक्रमितको संख्या ९ हजार ५२२ जना रहेका छन् । संक्रमणदर बढ्न थाले सँगै सरकारले खोप अभियानलाई पनि तिव्र गतिमा अगाडी बढाएको छ । पछिल्लो एक दिनमा एक लाख ८० हजारले खोप लगाएका छन् ।
विश्वव्यापी रुपमा फैलिइरहेको कोभिड १९ को नयाँ भेरियन्ट ओमिक्रोन नेपालमा पनि पुष्टी भए सँगै सरकारले उच्च सतर्कता अपनाउन सबै पक्षलाई निर्देशन दिइसकेको छ । आजबाट देशभरका सम्पुर्ण स्कुलहरुलाई माघ १५ गतेसम्म बिदा दिइएको छ ।
त्यस्तै सार्वजनिक स्थलमा २५ जना भन्दा धेरै बस्न नपाउने व्यवस्था गरिएको छ । सार्वजनिक बस तथा सार्वजनिक यातायात, होटल रेष्टुरेन्ट, सिनेमाहल लगायतका स्थानमा जादा खोप कार्डलाई अनिवार्य गरिने भएको छ ।
