काठमाडौं । महुली लघुवित्त वित्तीय संस्थाले संस्थापक शेयरको बोलकबोल लिलाम आवेदनको लागि समय थप गरेको छ । संस्थाले थप १० दिन अर्थात पुस २८ गतेसम्मका लागि समय थप गरेको हो । संस्थापक शेयर गत पुस ४ गतेदेखि ११ गतेसम्म लिलामी खुला गरेको थियो । संस्थाले ३ हजार ५०० कित्ता संस्थापक शेयर लिलामीमा विक्री खुला राखेको छ ।
उक्त शेयर खरीद गर्न इच्छुक विद्यमान संस्थापक वा व्यक्ति, कम्पनी तथा संस्थाले कम्पनीले बोलपत्र पेश गर्न सक्नेछन् । उक्त शेयरको न्यूनतम मूल्य ७३५ रुपैयाँ तोकिएको छ । आवेदकले तोकिएको मूल्य वा सोभन्दा बढी मूल्य अंकित गरी बोलकबोल गर्नु पर्ने हुन्छ ।
शेयर खरीदका लागि बोलकबोल गर्दा न्यूनतम ५०० कित्तादेखि अधिकतम सम्पूर्ण कित्तासम्म माग गर्न सकिने व्यवस्था छ । कम्पनीको शेयर विक्री प्रबन्धकमा सनराइज क्यापिटल लिमिटेड रहेको छ । हाल संस्थाको सर्वसाधारण तर्फको शेयर मूल्य १५१५ रुपैयाँ छ । गत आर्थिक वर्षको मुनाफाबाट २६ प्रतिशत बोनश शेयर दिदै छ । पुस २४ गते हुन लागेको साधारणसभाको बुक क्लोज भइसकेको छ ।
संस्थाले राम्रो लाभांश दिदै आएता पनि संस्थापक शेयरमा लगानीकर्ताको आकर्षण भने देखिएको छैन ।शेयर बजार घट्दो ट्रेण्डमा रहेकाले पनि संस्थाको संस्थापक शेयरमा लगानीकर्ताको आकर्षण नदेखिएको हो ।
