काठमाडौं । एकर्ड फर्मास्युटिकल्सले प्राथमिक शेयर निष्काशन गर्ने भएको छ । जसका लागि कम्पनीले विक्री प्रवन्धकमा ग्लोबल आइएमई क्यापिटललाई नियुक्त गरेको छ । सो सम्बन्ध सम्झौतामा बुधवार एकर्ड फर्मास्युटिकल्सको तर्फबाट अध्यक्ष विशाल पण्डित र ग्लोबल आइएमई क्यापिटलको तर्फबाट प्रमुख कार्यकारी अधिकृत पारस मणी ढकालले सम्झौतापत्रमा हस्ताक्षर गरेका छन् ।
कम्पनीले सर्वसाधारणमा प्रतिकित्ता अंकित मूल्य १०० रुपैयाँ अंकित दरको ४ लाख ८० हजार कित्ता आईपीओ निष्काशन गर्नेछ । कम्पनीको अधिकृत पूँजी ६५ करोड र जारी पूँजी ४८ करोड रुपैयाँ रहेको छ ।
उक्त कम्पनीको केन्द्रीय कार्यालय काठमाडौंको तीनकुनेस्थित सुविधानगरमा रहेको छ भने ललितपुर जिल्लाको महालक्ष्मी नगरपालिकास्थित लुभूमा ओषधी उत्पादन गर्ने कारखाना रहेको छ ।
