काठमाडौं । बीमा समितिले जमजुङ जिल्लाको क्वोल्हसोथर गाउँपालिकामा बीमा सम्बन्धी अन्तर्क्रिया तथा छलफल कार्यक्रम सम्पन्न गरेको छ । समितिको निर्देशक पुजन ढुङ्गेल अधिकारीको संयोजकत्वमा सम्पन्न उक्त कार्यक्रममा उप निर्देशक निर्मल अधिकारी र सहायक निर्देशक पुष्पा कुवरको उपस्थिति थियो ।
कार्यक्रममा गाउँपालिकाका प्रमुख, उप प्रमुख, जन प्रतिनिधिहरु, उद्योगी, व्यवसायी, कृषक सहित ७० जना भन्दा धेरैको सहभागिता थियो । समितिका निर्देशक पुजन ढुङ्गेलले सहभागीहरुलाई बीमा सम्बन्धी जानकारीमुलक प्रस्तुती दिएकी थिइन् । उनले बीमाको महत्व, बीमाका फाइदाहरु, बीमा कसरी गर्ने, दाबी कसरी प्राप्त गर्ने लगायतका विषयमा जानकारी दिएकी थिइन । यसका साथै उनले स्थानीय निकायलाई आफ्नो सेवा प्रवाहमा बीमालाई पनि टाइअप गरेर अगाडी बढ्न सुझाव दिएको थिइन् ।
कार्यक्रमलाई संवोधन गर्दै गाउँपालिका प्रमुखले बीमा गर्न जति सहज छ त्यो भन्दा धेरै दाबी पाउनमा समस्या रहेको उल्लेख गरेका थिए । उनले यस क्षेत्रमा बीमाको पहुँच बढाउन गाउँपालिका प्रतिवद्ध रहेको उल्लेख गरेका छन् । सहभागीहरुले कृषि बीमाको दाबी भुक्तानीलाई लिएर गुनासो गरेका थिए ।
