काठमाडौं । राष्ट्रिय कर दिवस २०७८ को अवसरमा बीमा क्षेत्रबाट सर्वाधिक कर तिर्ने नेपाल पुनर्बीमा कम्पनी सम्मानित भएको छ । कम्पनीले विगतका वर्षमा पनि सम्मान पाउदै आएको थियो । सरकारले कर दिवसको अवधिमा कम्पनीलाई सम्मान गरेको हो ।
सर्वाधिक कर बुझाउनेमा नेपाल दूरसञ्चार कम्पनी (नेपाल टेलिकम) रहेको छ। निर्यात उद्योग तर्फ शशिरञ्जन मिश्र, डाबर नेपालले सर्वाधिक कर बुझाएका कारण सम्मानित भएको छ । विशेष उद्योगतर्फ एशियन पेन्टसका प्रमुख गोपाल श्रेष्ठ सम्मानित भएका छन् । कृषि उद्योगतर्फ पूर्वाञ्चल एग्रो टेक सम्मानित भएको छ।
लघुवित्त वित्तीय संस्थाहरुको तर्फ छिमेक लघुवित्त वित्तीय संस्था, वाणिज्य बैंक तर्फ नबिल बैंकले सर्वाधिक कर बुझाए बापत सम्मानित भएका हुन् । सेवा तर्फबाट नोबेल हस्पिटल, पर्यटनबाट तारागाउँ रिजेन्सी(ह्यात) सम्मानित भएको छ । त्यस्तै भाटभटेनीले पनि धेरै तिरेबापत सम्मानित भएको हो । हाइड्रोपावरको तर्फबाट हिमाल पावर कम्पनीले सम्मान पाएको छ ।
व्यक्तिगततर्फ सबैभन्दा बढी कर तिर्नेमा यस पटक पनि सिद्धार्थ राणाले नै सम्मान पाएका छन् । सबैभन्दा बढी मूल्य अभिवृद्धि कर र आयकर बुझाउने उद्योगमा सूर्य नेपाल सम्मानित भएको छ। भ्याटमा अनुशासित भएको भन्दै घोराही सिमेन्टले सम्मान पाएको छ ।
