काठमाडौं । नविल बैंकको मुनाफा ७.३९ प्रतिशतले बढेको छ । चालु आर्थिक वर्षको पहिलो त्रैमाशिक अवधिमा बैंकले एक अर्ब ११ करोड रुपैयाँ मुनाफा आर्जन गरेको छ । गत वर्षको यहि अवधिमा बैंकले एक अर्ब तीन करोड रुपैयाँ मुनाफा आर्जन गरेको थियो ।
निक्षेप तथा कर्जा विस्तारमा सबैभन्दा आक्रामक देखिएको नविलको खुद व्याज आम्दानी पनि ४२.४१ प्रतिशतले सुधार भएको छ । तीन महिनामै बैंकले दुई अर्ब २४ करोड रुपैयाँ आर्जन गर्न सफल भएको छ ।
चालु आर्थिक वर्षको तीन महिनाको अवधिमा बैंक निक्षेप संकलन भन्दा कर्जा विस्तार मै आक्रामक देखिएको छ । यस अवधिमा निक्षेप संकलन १.०८ प्रतिशतले मात्रै बृद्धि हुँदा कर्जा लगानी भने ४.७१ प्रतिशतले बढेको छ । असोज मसान्तसम्ममा बैंकले २ खर्ब २५ अर्ब रुपैयाँ निक्षेप संकलन गरी दुई खर्ब ७ अर्ब रुपैयाँ कर्जा विस्तार गरेको छ ।
बैंकको खराव कर्जा भने बढेको छ । गत वर्ष ०.६५ प्रतिशत रहेको खराब कर्जा यस वर्ष बढेर १.१३ प्रतिशत पुगेको छ । बैंकको कष्ट अफ फण्ड बढे पनि स्प्रेडदर भने घटाएको छ । स्प्रेडदर ३.१८ प्रतिशतमा सिमित गरेको छ । प्रतिशेयर आम्दानी २९ रुपैयाँबाट बढेर ३२ रुपैयाँ पुगेको छ ।
बैंकको चुक्ता पूँजी १३ अर्ब ८४ करोड रुपैयाँ रहेको छ भने जगेडा कोषमा १५ अर्ब ६२ करोड रुपैयाँ रहेको छ ।
