काठमाडौं । एभरेष्ट बैंकले इतिहासकै सर्वाधिक कम लाभांश दिएको छ । दोस्रो बजारमा सबैभन्दा राम्रो लाभांश दिने बैंकले पछिल्लो दुई आर्थिक वर्षमा बैंकले १० प्रतिशत हाराहारीमै सिमित गरेको छ । बैंकको आज बसेको सञ्चालक समितिको बैंठकले ६ प्रतिशत बोनश शेयर र बोनश शेयरमा लागि कर प्रयोजन सहित ४.३२ प्रतिशत नगद लाभांशको प्रस्ताव गरेको छ । बैंकले गत आर्थिक वर्षमा ५ प्रतिशत बोनश शेयर र ५.५३ प्रतिशत नगद लाभांश दिएको थियो ।
नेपाल राष्ट्र बैंकको नीति अनुसार पूँजी बृद्धि पछि बैंकको लाभांशदरमा ह्वात्तै कमि आएको छ । आर्थिक वर्ष २०७२/२०७३ मा ७३.६७ प्रतिशतसम्म लाभांश दिएको बैंकले पछिल्ला वर्षमा १० प्रतिशतमै सिमित गरिदिएको छ । पूँजी बृद्धि पछि बैंकको लाभांश दिन सक्ने क्षमता पनि घटेको छ ।
नेपाल राष्ट्र बैंकले नगद लाभांशमा कडाइ गर्ने नीति लिए सँगै बैंकले दुई वर्षदेखि औपचारिकताका लागि मात्रै लाभांश घोषणा गरिरहेको छ । गत वर्षको मुनाफाको आधारमा बैंकको लाभांश दिन सक्ने क्षमता २६ प्रतिशत छ । तर बैंकले १०.३२ प्रतिशत लाभांश दिएर बाँकी रकम जगेडा कोषमै सुरक्षित गरेको छ ।
नेपाल राष्ट्र बैंकले नगद लाभांशलाई खुकुलो गरे पछि मात्रै बैंकले लाभांशदर बढाउने देखिएको छ । बैंकले प्रस्ताव गरेको लाभांश नेपाल राष्ट्र बैंकको स्वीकृति पछि साधारणसभा बोलाउन सक्ने छन् । साधारणसभाले पारित गरेपछि मात्रै शेयरधनीले प्राप्त गर्न सक्ने छन् ।
