काठमाण्डौं । जुरिच बीमा समूहद्वारा प्रवद्र्धित जुरिच फाउण्डेशनले कोरोना महामारीको कारण प्रभावित किशोरकिशोरीको मानसिक स्वास्थ्य अवस्था सुधारको लागी सहयोग गर्नेभएको छ ।
विशेषगरी १० देखि १९ वर्ष उमेर समूहका बालबालिका र किशोरकिशोरीहरु र तिनको स्याहार गर्ने अभिभावकलाई लक्षित गरेर नेपाल, मलेशिया, इण्डोनेशिया, भियतनाम, इक्वेडर, कोलम्बिया र मेक्सिकोमा युनिसेफमार्फत् कार्यक्रम संचालन गर्न सहयोगको घोषणा गरेको हो ।
यी सातवटा मुलुकमा ४ लाख प्रत्यक्ष प्रभावित लक्षित समूहको साथै १ लाख ५० हजार तिनको स्याहारमा खटिने मानिसहरुलाई समेट्ने लक्ष्य रहेको छ ।
विशेषगरी कोभिड महामारीको कारण बढ्दो मानसिक विचलनलाई नियन्त्रण गर्नको लागी यो कार्यक्रम प्रभावकारी हुने विश्वास लिइएको छ । जुरिच फाउण्डेशनले ग्लोबल कम्युनिकेशन क्याम्पेनमा युनिसेफमार्फत् विश्वभरको ३ करोड जनसंख्यामा जनचेतना अभिवृद्धि, ज्ञान र मानसिक स्वास्थ्य सुधारको लागी सकारात्मक संवाद र सम्पर्क स्थापित गर्ने कार्यक्रम समेत संचालन गर्ने भएको छ ।
यो विश्वव्यापी अभियानलाई विश्व मानसिक स्वास्थ्य दिवसको अवसरमा आगामी अक्टोबर(मंसिर) महिनामा घोषणा गर्ने योजना रहेको छ । नेपाललाई अन्तर्राष्ट्रिय दातृ संस्थाहरुमार्फत विभिन्न कार्यक्रमहरु संचालनको लागी सहयोग गर्दै आएको स्वीट्जरल्याण्डमा मुख्यालय रहेको जुरिच बीमा समूहको व्यवस्थापन र कर्मचारीद्वारा प्रवद्र्धन गरिएको संस्था हो,जुरिच फाउण्डेशन ।
