काठमाडौं । नेपाल ल्यूव आयल लिमिटेडको लाभांश सुरक्षित गर्ने आज अन्तिम दिन रहेको छ । कम्पनीले साधारण सभा प्रयोजनका लागि भोलि असोज ५ गतेदेखि बुक क्लोज गर्दैछ । त्यसकारण बुक क्लोजको आधारमा आज असोज ४ गतेसम्म कायम शेयरधनीहरु मात्र सभामा भाग लिन र लाभांश प्राप्त गर्न योग्य हुनेछन् ।
कम्पनीले असोज १८ गते ३०औं वार्षिक साधारण सभा गर्ने भएको छ । उक्त सभा कम्पनीको कार्यालय झम्सिखेल, ललितपुरमा विहान ११ः३० बजे गर्ने तयारी गरेको कम्पनीले जनाएको छ । कोरोना जोखिमलाई मध्यनजर गर्दै सभा भर्चुअल माध्यमबाट गर्ने तयारी गरेको हो ।
सभाले गत आर्थिक वर्ष ०७७/७८ को वार्षिक प्रतिवेदन सहितका वित्तीय विवरणहरु पारित गर्ने प्रस्ताव गरेको छ । त्यस्तै, आर्थिक वर्ष ०७८/७९ का लागि लेखापरीक्षक नियुक्ति र निजको पारिश्रमिक निर्धारण गर्ने एजेण्डा पनि सभामा रहेको छ ।
सभामा कम्पनीले ३० प्रतिशत बोनश शेयर र ५ प्रतिशत कर समेत नगद लाभांश वितरण गर्ने प्रस्ताव गरेको छ । साथै सर्वसाधारण तर्फबाट सञ्चालक नियुक्ति गर्ने प्रस्ताव पनि सभाका लागि तय भएको छ ।
