काठमाडौं । हाइड्रोइलेक्ट्रीसिटी इन्भेष्टमेण्ट एण्ड डेभलपमेण्ट कम्पनी (एचआईडिसीएल) को शतप्रतिशत हकप्रद शेयरमा भोलिसम्म आवेदन दिन सकिनेछ । कम्पनीले विद्यमान चुक्ता पूँजी ११ अर्बको आधारमा साउन ५ गतेदेखि १ः१ को अनुपातमा १०० अंकित दरको ११ अर्ब बराबरको ११ करोड कित्ता हकप्रद शेयर निष्काशन तथा बिक्री खुल्ला गरिरहेको छ । उक्त सेयरमा लगानीकर्ताले भोलि मंगलबारसम्म आवेदन दिन सक्नेछन् ।
कम्पनीले छिटोमा २५ गतेसम्मका लागि बिक्री खुल्ला गरेको उक्त शेयरमा १५ दिनको अवधि थप गरी भदौ ८ गतेसम्म पुर्याएको थियो । कम्पनीलेकोरोना महामारीको अवस्थालाई ध्यानमा राखी आवेदन दिने अवधि थप गरेको हो ।
हकप्रद शेयर विक्री प्रबन्धकमा ग्लोबल आइएमई क्यापिटल लिमिटेड रहेको छ । लगानीकर्ताले उक्त शेयरमा सी आस्वा सेवामा सहभागी सम्पूर्ण बैंक तथा वित्तीय संस्था र तीनका शाखा कार्यालयमार्फत पनि आवेदन दिन सक्नेछन् ।
त्यस्तै, लगानीकर्ताले ग्लोबल आइएमई बैंकको न्यूरोड, बानेश्वर, भक्तपुर थिमी र लगनखेल, ग्लोबल आइएमई बैंकको पोखरा, विराटनगर, जनकपुर, वीरगञ्ज, हेटौँडा, नारायणगढ, बुटवल, बाग्लुङ, नेपालगञ्ज, सुर्खेत, दाङ, धनगढी र महेन्द्रनगरबाट आवेदन दिन सकिनेछ ।
कम्पनीले हकप्रद शेयर प्रयोजनका लागि जेठ २८ गते (एक दिन) बुक क्लोज गरेको थियो । त्यसैले जेठ २७ गतेसम्म कायम शेयरधनीहरुले मात्र उक्त हकप्रदमा आवेदन दिन सक्नेछन् ।
कम्पनीले हकप्रद शेयर निष्कासनका लागि जेठ ९ गते नेपाल धितोपत्र बोर्डबाट अनुमति पाएको थियो ।
