काठमाडौं । सिद्धार्थ इन्स्योरेन्सको प्रमुख कार्यकारी अधिकृत (सिइओ) मा बीरेन्द्र वैदवार क्षेत्री नियुक्त भएका छन् । कम्पनीको बुधवार बसेको सञ्चालक समितिको बैठकले उनलाई आगामी चार वर्षका लागि सिइओमा नियुक्त गरेको हो ।
बीमा समितिले असाउ ३२ गते वैदवारलाई ४ वर्षका लागि कार्यकाल थप गर्न अनुमति दिएसँगै कम्पनीको सिइओमा नियुक्त भएका हुन् । भदौ १ उनको पहिलो कार्यकाल सकिएको थियो ।
बैदवार सिद्धार्थ इन्स्योरेन्सको स्थापनाको समयदेखि नै बरिष्ठ प्रबन्धकको रुपमा प्रवेश गरेका थिए । उनले युनाइटेड र सगरमाथा इन्स्योरेन्समा पनि काम गरिसकेका थिए । मार्केटिङ र अन्डराइटिङमा विशेष दख्खल राख्ने बैदवारले पुर्वाञ्चल विश्वविद्यालयबाट व्यवस्थापनमा स्नातकोत्तर गरेका छन् ।
त्यस्तै, उनले सिद्धार्थमै बरिष्ठ प्रबन्धक हुँदै सहायक महाप्रबन्धक, निमित्त प्रमुख कार्यकारी अधिकृत सहित एक कार्यकाल प्रमुख कार्यकारी अधिकृतको जिम्मेवारी पुरा गरिसकेका छन् ।
