काठमाडौं । आईएमई लाइफ इन्स्योरेन्स कम्पनीको जीवन बीमा कोष १०३ प्रतिशतले बृद्धि भएको छ । गत आर्थिक वर्ष २०७७/७८ मा कम्पनीको जीवन बीमा कोषमा २ अर्ब ९७ करोड रुपैयाँ जम्मा भएको छ । खुद बीमा शुल्क आर्जन र कुल बीमा शुल्क आर्जन ९९ प्रतिशत भन्दा धेरैले सुधार भएको छ ।
खुद बीमा शुल्क आर्जन ९९.३१ प्रतिशतले बढेर २ अर्ब ७३ करोड रुपैयाँ पुर्याउन सफल भएको छ त्यस्तै कुल बीमा शुल्क आर्जन पनि ९९.४७ प्रतिशतले बढाएर २ अर्ब ७९ करोड रुपैयाँ आर्जन गर्न सफल भएको हो ।
कम्पनीले दिर्घकालिन लगानी तथा कर्जा पनि ७६ प्रतिशतले बढाएर तीन अर्ब २५ करोड रुपैयाँ लगानी गरेको छ । बीमितले आफ्नो बीमालेख धितोमा राखेर २४ करोड ५१ लाख रुपैयाँ कर्जा लिएका छन् । यस्तो कर्जा अघिल्लो आर्थिक वर्षको तुलनामा ७१ प्रतिशतले बृद्धि भएको हो ।
खुद नाफामा भने झिनो अंकले सुधार भएको छ । कम्पनीले यस अवधिमा १३ करोड ४ लाख रुपैयाँ खुद मुनाफा आर्जन गरेको छ । लगानी कर्जा तथा अन्य आय ६२ प्रतिशतले बढाएर २३ करोड ५१ लाख रुपैयाँ आर्जन गरेको छ ।
अभिकर्ताले प्राप्त गर्ने कमिसन १०४ प्रतशतले बृद्धि भएको छ । आईएमईका अभिकर्ताले गत वर्ष मात्रै ५१ करोड ९७ लाख रुपैयाँ कमिसन प्राप्त गरेका छन् । प्राथमिक शेयर निष्काशनको प्रकृयाँमा रहेको कम्पनीको प्रतिशेयर नेटवर्थ १३७ रुपैयाँ छ । हाल चुक्ता पूँजी एक अर्ब ४० करोड रुपैयाँ छ भने जगेडा कोषमा ४७ करोड ७७ लाख रुपैयाँ जम्मा भएको छ ।
