काठमाडौं । प्रुडेन्सियल क्यापिटल म्यानेजमेन्टको स्वामित्वमा रहेका ४ वटा कम्पनीको लिलामी शेयरमा आवेदन दिने आज अन्तिम दिन रहेको छ । क्यापिटलले असार ११ गतेदेखि लिलामीमा ल्याएको ४ कम्पनीको ५ लाख ३० हजार कित्ता शेयरमा आज बैंकिङ समयसम्म आवेदन दिन सकिनेछ ।
कम्पनीले आफ्नो स्वामित्वमा रहेको प्रभु बैंक, नेशनल लाइफ इन्स्योरेन्स, नेपाल ग्रामिण विकास लघुवित्त र प्राइम कमर्सियल बैंकको संस्थापक सेयर लिलामीमा ल्याएको हो ।
प्रभु बैंकको १ लाख कित्ता, नेशनल लाइफ इन्स्योरेन्सको २ लाख २५ हजार कित्ता, नेपाल ग्रामीण विकास लघुवित्तको ३५ हजार कित्ता र प्राइम कमर्सियल बैकको १ लाख ७० हजार कित्ता रहेको छ ।
प्रभु बैंकको शेयरको न्यूनतम मूल्य २ सय २५ रुपैयाँ, नेशनल लाइफ इन्स्योरेन्सको ५ सय रुपैयाँ, नेपाल ग्रामीण विकास लघुवित्तको ६ सय रुपैयाँ र प्राइम कमर्सिलय बैंकको २ सय ५० रुपैयाँ तोकिएको छ ।
आवेदकले बोलपत्र पेश गर्दा तोकिएको मूल्य वा सोभन्दा बढी मूल्य अंकित गरी बोलपत्र पेश गर्नुपर्नेछ । उक्त शेयर खरीद गर्नका लागि योग्य इच्छुक विद्यमान संस्थापक वा जो कोही व्यक्ति, कम्पनी तथा संघ संस्थाले बोलपत्र पेश गर्न सक्नेछन् ।
शेयर खरीदका लागि बोलकबोल गर्दा न्यूनतम १० हजार कित्तादेखि अधिकतम सम्पूर्ण कित्तासम्म माग गर्न सकिनेछ । बिक्री प्रबन्धकमा एनआईसी एशिया क्यापिटल लिमिटेड रहेको छ ।
