काठमाडौं । एनआइसी एशिया सेलेक्ट ३० इन्डेक्स फण्डको आइपीओ तेस्रो दिनमा नै दिउँसो १ बजेसम्ममा शतप्रतिशत एकाई विक्री भइसकेको छ । एनआइसी एशिया क्यापीटल योजना ब्यवस्थापक रही संचालन गरेको १ अर्ब रुपैयाँको बन्दमुखी योजना गत १० गतेदेखि निष्काशन भएको हो । फण्डको विक्री खुला भएको तेस्रो दिनमा नै माग गरे बमोजिमको आवेदन प्राप्त भएको विक्री प्रबन्धक एनआइसी एशिया क्यापीटलले जनाएको छ ।
उक्त निष्काशनमा आज दिउसो १ बजेसम्म ५४ लाखभन्दा बढी आवेदनबाट शत् प्रतिशत इकाई विक्री भएको छ । उक्त फण्डको इकाईमा भोलि सोमबार बैंकिङ समयसम्म मात्र आवेदन दिन सकिनेछ ।
उक्त फण्डमा अत्याधिक माग भएको अवस्थामा फण्डको साइज १ अर्ब २५ करोड पुर्याउन सकिने क्यापीटललका सिइओ रमेन्द्र रायमाझीले बताए ।
यस योजनामा लगानीकर्ताले न्यूनतम १०० कित्तादेखि अधिकतममा १ करोड इकाइसम्म आवेदन दिन सकिने छ । लगानीकर्ताले सि–आस्बा सेवामा सहभागी बैंक तथा वित्तीय संस्थाहरु र तिनका शाखा कार्यालयहरुबाट खरिद आवेदन दिन सक्नेछन्। सीडीएसी एन्ड क्लियरिङले सञ्चालन गरेको मेरो सेयरबाट पनि अनलाइन आवेदन दिन सकिनेछ ।
