काठमाडौं । आजदेखि नेशनल लाइफ इन्स्योरेन्स कम्पनी लिमिटेडको ४७ हजार ५०६ र नागरिक लगानी कोषको ५० हजार कित्ता संस्थापक शेयर लिलामीमा विक्री खुला भएको छ ।
एनआईसी एशिया बैंकको स्वामित्वमा रहेको उक्त शेयर बैशाख २४ गतेसम्म गोप्य शिलबन्दी बोलपत्र पेश गर्ने गरी लिलामीमा आएको जनाएको छ ।
कम्पनीले नेशनल लाईफ इन्स्योरेन्सको शेयरको मूल्य प्रतिकित्ता ४४३ रुपैयाँ र नागरिक लगानी कोषको शेयरको मूल्य प्रतिकित्ता १ हजार ३४७ रुपैयाँ तोकेको छ । तोकिएको मूल्य वा सो भन्दा बढी मूल्य अंकित गरी बोलपत्र पेश गर्नुपर्नेछ ।
तोकिएको भन्दा कम मूल्य अंकित गरी पेश गरिएको बोलपत्र स्वतः रद्द हुने कम्पनीले जनाएको छ । यी शेयरमा बोलपत्र पेश गर्दा न्यूनतम १०० कित्तादेखि अधिकतम सम्पूर्ण कित्ता माग गर्न सकिनेछ ।
शेयर विक्री प्रबन्धकमा एनआईसी एशिया क्यापिटल रहेको छ । विक्री प्रबन्धकसँगै एनआईसी एशिया बैंकको कर्पोरेट कार्यालय थापाथली, काठमाडौं तथा विराटनगर, वीरगंज, पोखरा, बुटवल, धनगढी र सुर्खेतको शाखा कार्यालयमा बोलपत्र आवेदन प्राप्त गर्न र बुझाउन सकिने व्यवस्था रहेको छ ।
