काठमाडौं । बजार घटेको मौकामा ठुला लगानीकर्ताको ध्यान ब्लुचिप कम्पनीमा देखिएको छ । केहि समयदेखि शेयर बजार लगातार घटिरहेको छ । बजार घट्दा राम्रो ब्लुचिप कम्पनीको शेयर मूल्य पनि घटिरहेको छ । बजार घटेको मौकामा त्यस्ता कम्पनीमा अहिले लगानी गर्दा अधिकतम पूँजीगत लाभ लिन सकिने भन्दै म्युचुअल फण्ड, संस्थागत लगानीकर्ता तथा आम क्लेभर इन्भेष्टरको ध्यान ब्लुचिप कम्पनीमा देखिएको हो ।
बुधबार एनसिसी बैंक, अपर तामाकोशी, एचआइडिसिएल, नेपाल पुनर्बीमा, नेपाल इन्फ्राष्ट्रक्चर, एनआईसी एशिया बैंक, ग्लोबल आइएमई बैंक, शिवम सिमेन्ट, नविल बैंक, हिमालयन डिष्ट्रिलरीको सबैभन्दा धेरै कारोबार भएको छ ।
मर्जरको हल्लाका कारण एनसिसी बैंकको सर्वाधिक धेरै कारोबार भएको छ । त्यस्तै केहि समयदेखि अपर तामाकोशी हट केकको रुपमा रहेको छ । तामाकोशीले विद्युत उत्पादन सुरु गर्ने समाचारले दोस्रो बजारमा मूल्य बढिरहेको छ । हकप्रद भण्डका कारण हिमालयन डिष्ट्रलरीको शेयर मूल्यमा आकर्षण देखिन्छ । नेपाल पुनर्बीमा कम्पनीले हकप्रद निष्काशन गर्ने हल्लाले केहि समयदेखि बजार तातिरहेको छ ।
पछिल्लो समय राम्रो नाफा आर्जन गरिरहेका नविल बैंक, ग्लोबल आइएमई बैंक, एनआईसी एशिया बैंकको शेयर मूल्यमा लगानीकर्ताको आकर्षण देखिन्छ । लगानीकर्ताले यस्तो समयमा ब्लुचिप कम्पनीमा बढि ध्यान दिन्छन् ।
