काठमाडौं । कोभिड १९ को संक्रमण बढ्दै गए पछि नेपाल राष्ट्र बैंकले बैंक तथा वित्तीय संस्थाहरुलाई सतर्कता अपनाउन निर्देशन दिएको छ । राष्ट्र बैंकले पुर्ण सजगताका साथ कारोबार सुचारु गर्न बैंक तथा वित्तीय संस्थाहरुलाई अनुरोध गरेको छ ।
कर्मचारीहरुमा हुन सक्ने संक्रमण तथा संस्थाको व्यावसायिक निरन्तरतालाई मध्यनजर गर्दै संक्रमणको जोखिम न्यून हुने गरी सेवा प्रवाह गर्ने । कर्मचारीहरुलाई समूहमा विभाजन गरी समूह समूहबीच प्रत्यक्ष सम्पुर्क नहुने गरी काम गर्ने वातावरण निर्माण गर्न राष्ट्र बैंकले सुझाएको छ । यसका लागि आवस्यकताका आधारमा रिमोट एक्सेस, वर्क फ्रम होम, सिफ्टवाइज वर्क लगायतका उपायहरु अबलम्बन गर्न राष्ट्र बैंकको निर्देशन छ ।
कर्मचारीहरुमा संक्रमण भएको शंका लागेमा अविलम्ब परीक्षण गर्ने व्यवस्था गर्ने र संक्रमण देखिएका कर्मचारीलाई आइसोलेसन गर्ने तथा कन्ट्याक्ट ट्रेसिङमा परेका कर्मचारीलाई क्वारिन्टाइन गर्ने व्यवस्था गर्न राष्ट्र बैंकले निर्देशन दिएको छ ।
बैंक तथा वित्तीय संस्थालाई कोभिड १९ सम्बन्धी समस्याको सहजीकरण र सम्पुर्कका लागि कोभिड १९ सुरक्षा व्यवस्थापन समूह गठन गर्न निर्देशन दिइएकोमा सो समुहलाई सक्रिय रुपमा परिचालन गर्न पनि राष्ट्र बैंकले थप निर्देशन दिएको हो ।
सेवाग्राहीको भिडभाड नहुने तथा भौतिक दूरी कायम हुने व्यवस्था मिलाई सेवा प्रवाह गर्ने । साथै सेवाग्राहीको आवत जावत सकेसम्म कम हुने गरी बैंक तथा वित्तीय संस्थाले प्रदान गर्ने सेवाहरु यथासम्भव विद्युतीय माध्यमबाट गर्न गराउन प्रोत्साहन गर्ने । बैंक तथा वित्तीय संस्थाद्धारा संचालित एटिएम बुथहरुबाट हुन सक्ने संक्रमण जोखिम न्यूनिकरण गर्न ढोका खुला राखी स्यानिटाइजर एवं टिस्यु पेपरको व्यवस्था गर्न राष्ट्र बैंकले निर्देशन दिएको छ । बैंक तथा वित्तीय संस्थाबाट संचालन गरिने बैठक गोष्ठी सेमिनार तालिम जस्ता कार्यक्रमहरुमा भौतिक दूरी सुनिश्चित गर्ने तथा सम्भव भएसम्म यस्ता कार्यक्रम भर्चुअल माध्यमबाट गर्ने व्यवस्था मिलाउन निर्देशन दिइएको छ ।
IMG_20210419_0001
