काठमाडौं । नेपाल एसबिआई बैंकले आफ्ना संस्थागत ग्राहकका निम्ति बैंक खाताबाटै डिजिटल भुक्तानी गर्न सकिने गरी ‘कर्पोरेट पे’ प्रणाली शुरुगर्न नेपाल क्लियरिङ हाउससँग सम्झौता गरेको छ ।
सम्झौतापत्रमा बैंकका नायब प्रमुख कार्यकारी अधिकृत तथा प्रमुख वित्तीय अधिकृत मोहम्मद रिजवान आलम तथा नेपाल क्लियरिङ हाउसका प्रमुख कार्यकारी अधिकृत नीलेशमानसिंह प्रधानले हस्ताक्षर गरे ।
उक्त डिजिटल प्ल्याटफर्ममार्फत ग्राहकले बैंकमा नगई फन्ड ट्रान्सफर, तलब भुक्तानी, भेन्डर पेमेन्ट, सरकारी राजस्व भुक्तानीलगायत अन्य विभिन्न व्यावसायिक भुक्तानी खाताबाटै गर्न सक्नेछन् ।
उक्त प्रणालीमार्फत कनेक्ट आईपीएस अथवा एनसीएचएल–आईपीएसमा रियल–टाइम वा नन–रियल–टाइममा भुक्तानी कारोबार गर्न सकिनेछ । बैंकबाट आवश्यक प्रक्रिया पूरा गरी यो सेवा उपयोगमा ल्याउन सकिने प्रावधान छ ।
यस प्रणालीको प्रयोग र विस्तार पश्चात बैंक शाखा नपुगी विभिन्न भुक्तानी अन्लाईन नै गर्न सकिने हुँदा व्यावसायिक ग्राहकहरुलाई अझ बढि सहज हुने बैंकले जनाएको छ ।
