काठमाडौं । वायु प्रदूषणका कारण शिक्षा, विज्ञान तथा प्रविधि मन्त्रालयले भोलिदेखि चार दिन देशभरका शिक्षण संस्था बन्द गर्ने निर्णय गरेको छ । वायु प्रदूषणका कारण बालवालिकाको स्वास्थ्यमा गम्भीर असर पर्ने भन्दै मन्त्रालयले बन्द गर्ने निर्णय गरेको हो ।
केहि दिनदेखि काठमाडौं उपत्यका सहित अन्य भुभागमा वायु प्रदूषणका कारण जनजीवन प्रभावित बन्दै गइरहेको छ । जल तथा मौसम विद्का अनुसार विगत लामो समयदेखि पानी नपर्दा बादलमा धुँवा धुलोको मात्रै बढिरहेको छ । यसका साथै केहिदिनदेखि डढेलोका कारण थप वायु प्रदूषण भैरहेको छ ।
सोमबार शिक्षा, विज्ञान तथा प्रविधिमन्त्री कृष्णगोपाल श्रेष्ठको अध्यक्षतामा बसेको आकस्मिक बैठकले सम्पूर्ण शिक्षण संस्था बन्द गर्ने निर्णय गरेको हो । अहिलेको प्रदुषणले लाखौ विद्यार्थीको स्वास्थ्यमा प्रतिकुल असर पुर्याउन सक्ने भन्दै शिक्षण संस्था बन्द गर्नु परेको मन्त्रालयले जनाएको छ । मंगलबारदेखि शुक्रवारसम्म सम्पुर्ण शैक्षिक संस्था बन्द हुनेछ ।
