काठमाडौं । अपर तामाकोशी हाइड्रोपावरले चालु आर्थिक वर्षको दोस्रो त्रैमासको वित्तीय विवरण सार्वजनिक गरेको छ । अपर तामाकोशी हाइड्रोपावरले प्रकाशन गरेको पुस मसान्तसम्मका वित्तीय विवरण अनुसार ३ करोड १५ लाख ७१ हजार खुद नोक्सानीमा रहेको छ ।
गत आर्थिक वर्षभन्दा यस वर्ष कम्पनीको खुद नोक्सानी बढेको हो । गत वर्ष यस अवधिसम्म कम्पनी २ करोड ३३ लाख रुपैयाँ खुद नोक्सानीमा थियो ।
यस वर्ष वित्तीय लागत गत वर्षभन्दा १० गुणा बढी भएकाले पनि खुद नोक्सानी बढेको देखिन्छ । गत आर्थिक बर्षमा ११ लाख ११ हजार वित्तीय लागत रहेको कम्पनीको यस वर्ष यो लागत १ करोड १२ लाख रुपैयाँ रहेको छ ।
दोस्रो त्रैमाससम्म कम्पनीले नेपाल विद्युत् प्राधिकरण मार्फत नेपाल सरकारको १२ अर्ब ५० करोड रुपैयाँ , संस्थापक शेयरधनीहरु नेपाल टेलिकम, नागरिक लगानीकोष र राष्ट्रिय बीमा संस्थानबाट १४ अर्ब रुपैयाँ दिर्घकालिन ऋण प्राप्त गरेको छ ।
साथै नेपाल विद्युत् प्राधिकरणबाटै २ अर्ब रुपैयाँ अल्पकालिन ऋणपनि कम्पनीले लिएको छ । दोस्रो त्रैमाससम्म कम्पनीको दिर्घकालिन कर्जा ४० अर्ब ८ करोड ३० लाख रुपैयाँ र अल्पकालिन कर्जा २ अर्ब ७५ करोड रुपैयाँ रहेको छ ।
हाल कम्पनीको चुक्ता पूँजी १० अर्ब ५९ करोड रुपैयाँ रहेको छ भने जगेडा कोष रकम भने ८२ करोड २० लाख रुपैयाँ ऋणात्मक रहेको छ । प्रतिशेयर आम्दानी ० दशमलव ३० ऋणात्मक रहेको कम्पनीको प्रतिशेयर नेटवर्थ ९२ दशमलव २४ रहेको छ ।
