काठमाडौँ । अपि पावर कम्पनी लिमिटेडले चालु आर्थिक वर्ष २०७७/७८ को दोस्रो त्रैमासको वित्तीय विवरण सार्वजनिक गरेको छ । दोस्रो त्रैमाससम्म आइपुग्दा कम्पनीले १४ करोड ३२ लाख १२ हजार रुपैयाँ खुद नाफा आर्जन गर्न सफल भएको छ । गत आर्थिक वर्षको सोही अवधिको तुलनामा कम्पनीको नाफा २४५ दशमलव ७९ प्रतिशतले बढी हो । गत आर्थिक वर्षको सोही अवधिमा कम्पनीले ४ करोड १४ लाख १५ हजार रुपैयाँ खुद नाफा आर्जन गरेको थियो ।
कम्पनीको चुक्ता पूँजी १ अर्ब ९२ करोड ९७ लाख रुपैयाँ रहेको छ । जगेडा कोषमा २९ करोड ७० लाख ८१ हजार रूपैयाँ संचिती रहेको छ ।
समिक्षा अवधिमा कम्पनीले विद्युत विक्री वापत २४ करोड १९ लाख ६७ हजार रूपैयाँ आम्दानी गरेको छ । गत आर्थिक वर्षको सोही अवधिमा कम्पनीले विद्युत विक्री वापत १३ करोड ५० लाख ३५ हजार रुपैयाँ मात्र आम्दानी गरेको थियो ।
कम्पनीको अन्य स्रोतबाट हुने आम्दानी पनि १४ लाख ५ हजार रुपैयाँबाट बढेर ६ करोड १७ लाख ७० हजार रुपैयाँ पुगेको छ ।
दोश्रो त्रैमासमा कम्पनीको प्रतिशेयर आम्दानी पनि ६ रुपैयाँ ९६ पैसाबाट बढेर १४ रुपैयाँ ८४ पैसा पुगेको छ । कम्पनीको प्रतिशेयर नेटवर्थ पनि १०९ रुपैयाँ ७१ पैसाबाट बढेर ११५ रुपैयाँ ३९ पैसा पुगेको छ ।
