काठमाडौं । बीमा पुलमार्फत संचालन हुँदै आएको म्यादी जीवन बीमाशुल्क ७ करोड रुपैयाँ मात्र उठेको छ । चालु आर्थिक वर्ष २०७७।७८ को मंसिर मसान्तसम्ममा जीवन बीमा कम्पनीहरुले वैदेशिक रोजगारीमा जानेहरुलाई पुलमार्फत संचालन गरिएको म्यादी बीमा बापत ७ करोड रुपैयाँ बीमा शुल्क आर्जन भएको छ ।
जीवन बीमा कम्पनीहरुले पाँच महिनाको अवधिमा ६ लाख २९ हजार ५ सय ७३ वटा वैदेशिक रोजगार बीमालेख बिक्रि गरि उक्त बीमाशुल्क आर्जन गरेका हुन् । म्यादी बीमा गर्नेको संख्यामा पछिल्लो समयमा निकै कमी आएको छ । बीमा समितिले दिएको तथ्याङ्कलाई हेर्दा विगतका तुलनामा म्यादी बीमा गर्नेको संख्या कम देखिएको हो । कोभिड–१९ को प्रभावका कारण वैदेशिक रोजगारीमा जानेको सङख्या घटेसँगै म्यादी बीमामा यसको प्रत्यक्ष प्रभाव देखिएको बीमा कम्पनीका अधिकारीहरु बताउँछन् ।
बीमा समितिको तथ्याङक अनुसार मंसिर मसान्तसम्ममा चार वटा पुल व्यवस्थापक कम्पनीमध्ये सिटिजन लाइफ इन्स्योरेन्सले सबैभन्दा धेरै बीमाशुल्क आर्जन गर्न सफल भएको छ । कम्पनीले यस अवधिसम्ममा ४ करोड रुपैयाँ बीमा शुल्क आर्जन गर्न सफल भएको छ ।
त्यस्तै, नेशनल लाइफ इन्स्योरेन्स कम्पनीले १ करोड रुपैयाँ नेपाल लाइफले १ करोड रुपैयाँ, नेपाल लाइफले १ करोड रुपैयाँ, सन नेपाल लाइफले १ करोड रुपैयाँ वैदेशिक रोजगार बीमामार्फत बीमाशुल्क आर्जन गर्न सफल भएको छ ।
२०६४ देखि नेपालमा वैदेशिक रोजगारीमा जाने कामदारले वैदेशिक रोजगार म्यादी जीवन बीमा गर्नुपर्ने व्यवस्था सुरु भएको हो । विदेशमा जाने कामदार असुरक्षित बन्दै गएपछि सरकारले जारी गरेको वैदेशिक रोजगार ऐन २०६४ को दफा २६ मा बीमा गर्नुपर्ने व्यवस्था हो।
