काठमाडौं । बीमा समिति आजबाट अध्यक्ष विहिन भएको छ । अध्यक्ष चिरञ्जीवी चापागाईको कार्यकाल आजबाट सकिएको छ । बीमा क्षेत्रको नियमनकारी निकाय बीमा समितिमा कार्यकारी अध्यक्ष मन्त्रिपरिषदबाट नियुक्त हुने व्यवस्था छ ।
अर्थमन्त्रालयले बीमा समितिमा नयाँ अध्यक्ष नियुक्त गर्ने बिषयमा छलफल सुरु भएको जनाएको छ । बीमा समितिको अध्यक्ष बन्न आधा दर्जनबढिले आकांक्षा देखाइरहेका छन् । तर चर्चामा रहेकाबाट भन्दा पनि कुनै पनि चर्चामा नरहेका मध्येबाट अध्यक्ष बन्न सक्ने सम्भावना रहेको अर्थमन्त्रालय स्रोतले जनाएको छ ।
२०७३ साल पुस १४ गते बसेको मन्त्रिपरिषदको निर्णय अनुसार पुस २४ गते बीमा समितिमा अध्यक्षको जिम्मेवारी सम्हालेका चापागाईको कार्यकाल आजबाट सकिएको छ । कार्यकाल सकिनु एक साता अघि नै चापागाई बिदामा बसिसकेका छन् ।
चापागाईले आफ्नो कार्यकालमा बीमाको पहुँच उच्च अंकले बृद्धि गर्न सफल भएका थिए । उनकै पालामा थुप्रै नयाँ कम्पनीहरु दर्ता भई गाउ गाउँमा बीमा जनचेतना पुगेको तथ्याङ्कले देखाएको छ । परम्परागत रुपमा चल्दै आएको बीमा क्षेत्रलाई चापागाईको पालामा नियमनका धेरै कोणबाट ट्रेसिङ गर्न सक्ने गरी एनएफआरएस लागू गर्ने लगायतका कामहरु भएका छन् । चापागाईकै पालामा विवादास्पद कोरोना बीमा पोलिसी जारी भएको थियो ।
बीमा समितिमा अध्यक्ष नहुँदा बीमा कम्पनीका धेरै कामहरु प्रभावित भइसकेका छन् । बीमा समितिमा अध्यक्ष नहुँदा नेको इन्स्योरेन्समा नियुक्त भएका नयाँ अध्यक्षले शपथ लिन नपाउँदा बोर्ड बैठक प्रभावित छ ।
यसैबीच, बीमा समितिले अध्यक्ष चापागाईले तत्काल बिदाई नगर्ने भएको छ । अध्यक्ष चापागाई बिदा मनाउन राजधानी बाहिर भएकोले केही समयपछि बिदाई गर्ने बीमा समितिले जनाएको छ ।
