काठमाडौं । चन्द्रागिरी हिल्सले आगामी साताबाट १५ लाख कित्ता भन्दा बढिको लागि आईपिओ जारी गर्ने घोषणा गरिसकेको छ । चन्द्रागिरी हिल्सको आईपिओ सकिए लगत्तै नेपाल पूर्वाधार बैंक पनि आईपिओ जारी गर्ने अन्तिम तयारीमा छ । त्यस्तै अन्य संस्था तथा बीमा कम्पनीहरुको पनि आईपिओ पाईप लाईनमै छन् ।
तत्काल जारी हुन लागेका दुई आईपिओको लागि २५ अर्बभन्दा बढि रकम बैंकमा फ्रिज हुँदैछ । चन्द्रागिरी हिल्सको आईपिओको लागि न्यूनतम् १० कित्ता मात्रै आवेदन पर्याप्त हुनेछ भने नेपाल पूर्वाधार बैंकको आईपिओमा न्यूनतम १०० कित्ता आवेदन दिनुपर्ने अवस्था छ । पछिल्लो पटक आवेदन भरेकाहरुको तथ्याङ्क हेर्दा झण्डै ११ लाख जनासँग डिम्याट खाता छ । सो आधारमा पनि आठ करोड कित्ता आईपिओ खुल्ला हुँदा प्रतिव्यक्ति न्यूनतम ५० कित्ता भन्दा बढि अधिकतम १०० कित्तासम्म आईपिओ पर्न सक्ने देखिन्छ ।
लगानीकर्ताहरुले यस पटकको आईपिओमा कम्तीमा पनि १०० कित्ताको लागि आवेदन दिने हो भने १० हजार रुपैयाँ र दिन खोलेर आईपिओ भरेको अवस्थामा १५ हजार रुपैयाँको आईपिओ भर्नुपर्नेछ । यस पटकको आईपिओमा ठूलो मात्रामा लगानी गर्नुपर्ने अवस्था छ । आईपिओमा लगानी गर्नेक्रममा न्यूनतम १५ अर्ब रुपैयाँदेखि अधिकतम् २५ अर्ब रुपैयाँसम्म रकम फ्रिज हुने अनुमान गरिएको छ । नेपाल पूर्वाधार बैंकले जारी गर्न लागेको आठ अर्ब रुपैयाँ बराबरको आठ करोड कित्ता शेयरको लागि कम्तीमा पनि १५ देखि २० रुपैयाँको आवेदन पर्ने अनुमान गरिएको छ । त्यस्तै, चन्द्रागिरी हिल्सले जारी गर्ने आईपिओमा कम्तीमा दुई अर्ब देखि चार अर्ब रुपैयाँसम्मको आवेदन पर्ने अनुमान गरिएको छ ।
ठूलो मात्रामा आईपिओ जारी हुन लागेकोले एकै पटक बैंकमाथि तरलताको भार पर्ने देखिएको छ । यद्यपि कोरोनाको कारण नेपालका बैंकहरुमा अर्बौ रुपैयाँ तरलता थुप्रिएका कारण बैंकहरुलाई समस्या पर्ने छैन ।
