काठमाडौं । सनराइज बैंकको बार्षिक साधारणसभा आगामी पुस २४ गते हुने भएको छ । कूल ८.२८ प्रतिशत लाभांश दिने घोषणा गरेको बैंकले पुस २४ गते बिहान १० बजे काठमाडौंको बालुवाटारस्थित आम्रपाली ब्याङ्क्वेटमा साधारणसभा सभा आह्वान गरेको हो ।
यसअघि बैंकहरुले डिजिटल माध्यमबाट साधारणसभा आयोजना गर्दै आएकोमा सनराईज बैंकले पार्टी प्यालेसमा साधारणसभा घोषणा गरेको हो ।
बैंकले आर्थिक वर्ष ७६।७७ को मुनाफाबाट ५.८० प्रतिशत बोनस शेयर र २.४८ प्रतिशत नगद लाभांश गरी कुल ८.२८ प्रतिशत लाभांश वितरण गर्ने निर्णय गरी राष्ट्र बैंकबाट समेत अनुमति लिई सकेको छ । उक्त लाभांश साधारणसभाबाट पारित भएपछि वितरण गरिने कम्पनीले जनाएको छ । कूल चुक्ता पुँजी ८ अर्ब ९६ करोड ७८ लाख रहेको बैंकको साधारणसभामा वित्तीय विवरण पारित गर्ने लगायतका नियमित एजेण्डाहरुसहित प्रबन्धपत्र नियमावली संशोधन गर्दैछ ।
बैंकले साधारणसभा प्रयोजनको लागि पुस ७ गते बुक क्लोज गर्ने निर्णय गरेको छ । पुस ६ गतेसम्म कायम शेयरधनीले मात्र साधारणसभामा भाग लिन तथा प्रस्तावित लाभांश पाउन सक्ने बैंकले जनाएको छ ।
