काठमाडौं । नेपाल स्टक एक्सचेन्जमा चार वटा बाणिज्य बैंकको शेयर मूल्य समायोजन गरिएको छ । ३३.५० प्रतिशत लाभांश दिने निर्णय गरेको नबिल बैंकको शेयर मूल्य समायोजन भएको छ ।
१३८६ रुपैयाँ रहेकोमा शेयर मूल्य समायोजन भई १०३८ रुपैयाँ कायम भएको छ । बैंकले विगतका वर्षहरुमा झण्डै शत प्रतिशतसम्म लाभांश दिने गरेकामा पछिल्ला वर्षहरुमा न्यून हुँदै गएको छ ।
त्यस्तै, ग्लोबल आईएमई बैंकको १४ प्रतिशत लाभांश वितरण गर्ने प्रस्ताव गरेकोमा आज शेयर मूल्य समायोजन गरिएको छ । यसअघि ३५० रुपैयाँमा शेयर कारोबार भएकोमा समायोजित मूल्यपछि ३०७ रुपैयाँ कायम भएको छ ।
त्यस्तै, एसबीआई बैंकको शेयर मूल्यमा पनि समायोजन गरिएको छ । ६ प्रतिशत बोनस शेयर दिने घोषणा गरेको बैंकको शेयर मूल्य ४०८ रुपैयाँबाट ३८५ रुपैयाँ कायम गरिएको छ ।
उता, कृषि विकास बैंकले वितरण गर्न लागेको १५ प्रतिशत बोनस शेयरका कारण शेयर मूल्य ४८८ बाट घटेर ४२४ रुपैयाँ कायम भएको छ । बुक क्लोज मितिपछि शेयर मूल्य समायोजनको क्रममा शेयर मूल्य घटेको हो ।
